Шығыс Қазақстан облысында 2023 жылы мемлекеттік меншікке 100,6 мың га пайдаланылмайтын ауыл шаруашылығы мақсатындағы жерлер қайтарылды. Ағымдағы жылға арналған жоспар - 120 мың га. Бұл туралы облыс әкімдігінің баспасөз қызметі хабарлады.
"Мемлекет меншігіне қайтарылған жерлердің 18,5 мың га айналымға тартылды, оның ішінде азаматтарға 15,6 мың га, агроқұрылымдарға - 2,9 мың га берілді. Қайтарылған жерлер басым тәртіппен жергілікті тұрғындарға жеке ауладағы мал жаю үшін беріледі", - деп хабарлады әкімдікте.
Пайдаланылмайтын ауыл шаруашылығы мақсатындағы жерлерді анықтау Ғарыш-Сапары веб-порталында ғарыштық мониторинг арқылы жүргізілді. Облыс бойынша барлығы 760,5 мың га пайдаланылмайтын жер тіркелген.
Ағымдағы жылдың басынан бастап 93,3 мың га ауыл шаруашылығы жері мемлекеттік меншікке қайтарылды, оның ішінде 65,8 мың га (71%) - жер пайдаланушылардың өз жер учаскелерінен ерікті түрде бас тартуы есебінен, 21,1 мың га (22%) - жалдау мерзімінің аяқталуы есебінен, 1,5 мың га (2%) - бұзушылықпен қабылданған жергілікті жер атқарушы органдардың шешімдерінің күшін жою есебінен. Тағы 5 мың га (5%) сот шешімі бойынша мәжбүрлі түрде тәркіленді.
Ағымдағы жылы қайтарылған жерлердің 3,9 мың га айналымға тартылды, оның ішінде азаматтарға 3,8 мың га, агроқұрылымдарға - 0,1 мың га берілді.
