Жетісу облысында соңғы екі жылда 49 жаңа ветеринариялық пункт және бір ветстанция іске қосылды. Биыл тағы 20 ветпункт салу жоспарлануда. Облыста ветеринариялық қызмет көрсетуді жақсарту үшін цифрлық технологиялар да белсенді енгізілуде, деп хабарлады облыс әкімінің баспасөз қызметі.
Бүгінгі таңда Жетісу облысында мал басы 2,3 млн-нан асады: шамамен 500 мың бас ІҚМ, 1,6 млн бас ұсақ мал және 200 мыңнан астам жылқы. Барлық мал басы "Ауыл шаруашылығы жануарларын бірдейлендірудің электрондық дерекқоры" мемлекеттік ақпараттық жүйесінде тіркелген.
Ветеринария басқармасының мәліметінше, осы кезеңде өңірде 34 763 ауыл шаруашылығы жануарларының иесі тіркелген, олардың барлығы TortTulik мобильді қосымшасын пайдаланады.
Ауыл шаруашылығы жануарларының аса қауіпті ауруларын диагностикалау және малды сәйкестендіру үшін VetLab, ISZH-Mobile модульдері белсенді пайдаланылады.
"Iszh-Mobile ауылшаруашылық жануарларын сәйкестендіру дерекқорының мобильді қосымшасы іске қосылғаннан кейін біздің аймақтағы ветеринарларға планшеттер берілді, бұл біздің жұмысымызды айтарлықтай жеңілдетті және жеделдетті. Шаруашылықтарды, жеке аулаларды аралау барысында, профилактикалық іс-шаралар, вакцинация және т.б. шеңберінде анықталған барлық ақпаратты дереу дерекқорға енгізуге мүмкіндік туды. Сонымен қатар, интернет қолжетімді болмауы мүмкін жерлерде де база офлайн режимінде жұмысын жалғастыруда. Ал интернетке қосылғаннан кейін енгізілген деректер автоматты түрде жаңартылады", - деді Талдықорған ветеринариялық станциясының ветеринар дәрігері Әйгерім Бекбосынова.
Сонымен қатар, Жетісу облысының цифрлық технологиялар басқармасы "Облыстың ахуалдық орталығы" электрондық картасына сібір жарасын көмуді, мал қорымдарын және ветеринариялық пункттерді енгізді. Қазіргі уақытта ведомствоаралық комиссияның қорытындысы негізінде осы электрондық картаға мал қорымдарының санитарлық-қорғау аймақтары енгізілуде.
