Жер ресурстарын басқару комитеті жыл басынан бері 1,15 млн га пайдаланылмаған және заңнаманы бұза отырып берілген ауыл шаруашылығы жерлері мемлекеттік қорға қайтарылғанын хабарлады.
Бұдан әрі де пайдаланылмаған, сондай-ақ заңнаманы бұза отырып берілген жерлерді мемлекетке қайтару бойынша жұмыстар жүргізіліп жатқаны хабарланады. Бұл туралы baibolsyn.kz ҚР Ауыл шаруашылығы министрлігінің баспасөз қызметіне сілтеме жасай отырып хабарлайды.
"Атап айтқанда, Ақтөбе облысының Қарғалы ауданында ауыл шаруашылығы жануарларын бірдейлендіру базасына сәйкес ЖШС-нің бірінің жайылымдық жер учаскелерінде мал басы жоқ екендігі анықталды. Учаскелердің ауданы 30 мың га құрайды", - деп хабарлады ҚР Ауыл шаруашылығы министрлігінің баспасөз қызметі.
ҚР АШМ ЖРБК аумақтық департаменті ЖШС-дан жер учаскелерін алып қою туралы ҚР Жер Кодексінің 94-бабына сәйкес сотқа талап арыз берген. Бұл талап-арыз Ақтөбе облысының мамандандырылған ауданаралық экономикалық сотының шешімімен қанағаттандырылды.
ЖШС-нің апелляциялық шағымы қанағаттандырусыз қалдырылды, ал жер учаскелері Қарғалы ауданының жер қорына енгізілді.
