Қазақстанда аграрлық кодексті әзірлеу ұсынылды

Қазақстанның Ет одағының басшысы Мақсұт Бақтыбаев саладағы қатынастарды реттейтін ҚР аграрлық кодексін әзірлеуді ұсынды. Бұл бастама Қазақстанның агроөнеркәсіптік кешені қауымдастықтары Альянсының, салалық бірлестіктер өкілдерінің және Мәжіліс депутаттарының кездесуінде айтылды.

Мәжілістің баспасөз қызметінен хабарлағандай, әріптестер аграрлық кодекс бойынша ұсынысты қолдады.

Өз кезегінде Қазақстанның Астық одағының басшысы Нұрлан Оспанов астықтың заңсыз айналымына қарсы іс-қимыл мақсатында "Астық туралы" заңға өзгерістер енгізуді ұсынды. Ол бұл үшін астық декларациясын арнайы ақпараттық жүйеге тіркеу арқылы енгізу қажет екенін атап өтті.

Кездесу барысында АӨК субъектілерін мемлекеттік қолдау, қаржыландырудың қолжетімділігі, кадрлар даярлау және фермерлердің құзыреттілігін арттыру, ауылдық аумақтарды дамыту және жерді суару, бірыңғай аграрлық салықты енгізу мәселелері талқыланды. Мұның бәрі Мәжілістің жаңа құрамының жұмысында ескерілетін болады.

"Мәселелерді бірге шешу керек, олар бәрімізге қатысты. Біз ынтымақтасуға, сізбен жүйелі түрде кездесуге, сізді ағымдағы жұмысқа тартуға дайынбыз. Бұл күндері біз жұмысқа алатын өзекті тақырыптарды қалыптастырамыз. Сіздерді күн тәртібіне өз ұсыныстарыңызды енгізуге шақырамыз", - деді Мәжілістің аграрлық мәселелер жөніндегі комитетінің төрағасы Серік Егізбаев.