АНК егіндікті қаржыландыруға өтінімдерді қабылдауды бастады

Аграрлық несие корпорациясы 1 қарашада "Кен дала 2" бағдарламасы бойынша жеңілдетілген қаржыландыруға өтінімдерді қабылдауды бастады. Бұл туралы корпорацияның баспасөз қызметі хабарлады.

"Біз көктемгі егіс және егін жинау жұмыстарын жүргізу үшін ерте қаржыландыруды іске қосамыз. Алғашқы 100 млрд теңгеге өтінімдерді қабылдау қараша айынан басталады. Сонымен қатар, біз мемлекеттік қолдау шараларын сақтап қалдық, фермерлер бұрынғы жеңілдікті шарттармен несие ала алады", - деді Аграрлық несие корпорациясының Басқарма төрағасы Алмат Әшірбеков.

2025 жылғы егіс және егін жинау жұмыстарын қаржыландыруға барлығы 700 млрд теңге бағытталатын болады, оның 560 млрд теңгесі "Бәйтерек" ҰБХ мен АНК нарықтық капитал көздерінен тартылатын болады.

"Кен дала 2" бағдарламасы бойынша қарыздар бұрынғы шарттарда берілетін болады: сыйақы мөлшерлемесі - жылдық 5%. Сондай-ақ "Даму" кәсіпкерлікті дамыту қорының қарыздарға кепілдік беру құралы пайдаланылады.

Өз кезегінде, ҚазАгроҚаржы жылдық 5% жеңілдікті лизингті іске қосты. Бағдарлама отандық өндірушілердің ауыл шаруашылығы техникасын сатып алу үшін 7 жылдан аспайтын мерзімге қаржыландыруды ұсынуды көздейді.

Кеңес алу және "Кең дала 2" бағдарламасына өтінім беру үшін АНК-нің жақын маңдағы өңірлік филиалдарына жүгіну қажет.