2025 жылы Аграрлық несие корпорациясы егіс және егін жинау жұмыстарын қаржыландыруға 700 млрд теңге бөлуді жоспарлап отыр. Бұл ретте ерте қаржыландыру көзделетін болады. Бұл туралы АНК баспасөз қызметі хабарлады.
"Біз алғаш рет көктемгі егіс және егін жинау жұмыстарын жүргізуге ерте қаржыландыруды іске қосып отырмыз. Біз алғашқы 100 млрд теңгені биыл беруді жоспарлап отырмыз, өтінімдерді қабылдауды қараша айынан бастау жоспарлануда. Жалпы, 2025 жылғы дала жұмыстарын жүргізуге 700 млрд теңге бөлуді жоспарлап отырмыз", - деді Аграрлық несие корпорациясының Басқарма төрағасы Алмат Әшірбеков Қостанай облысындағы Мәжілістің Аграрлық мәселелер жөніндегі комитетінің көшпелі отырысында.
Сондай-ақ, 200 млрд теңгеге дейін ҚазАгроҚаржы желісі бойынша лизингке техника сатып алуға қаржыландыру көлемі жылдық 5% - бен ұлғайтылатын болады.
Осылайша, 2025 жылы фермерлерді жеңілдетілген қаржыландырудың жалпы көлемі шамамен 900 млрд теңгені құрайды.
Алмат Әшірбеков атап өткендей, Аграрлық несие корпорациясы 2022 жылдан бастап қаржыландыру шарттарын біртіндеп жақсартып келеді.
"Егер бұрын көктемгі егіс және егін жинау жұмыстарын жүргізуге бюджет қаражаты есебінен жылына 5% мөлшерлеме бойынша шамамен 60-70 млрд теңге берілсе, 2022 жылдан бастап біз бюджеттік несиелеу есебінен қаржыландыру көлемін екі есеге арттырдық және несиелерді қайтару мерзімін ұлғайттық. Бұрын қайтару желтоқсанда болатын, біз наурызға дейін ұлғайттық. Бұл шаруаларды қолдау үшін жасалды", - деп атап өтті АНК басшысы.
Сондай-ақ, биылғы жылы АНК желісі бойынша "Кең дала 2" және ҚазАгроҚаржы желісі бойынша отандық техниканың лизингі сияқты жаңа жеңілдікті бағдарламалар бекітілді. Оларды қаржыландыруға қаражат капитал нарықтарынан коммерциялық шарттармен тартылды, бұл ретте фермерлер үшін сыйақы мөлшерлемесі жылдық 5% деңгейінде қамтамасыз етілді.
