АНК жастарға 5,8 мың жеңілдетілген шағын несие береді

Аграрлық несие корпорациясы 2023 жылы жас кәсіпкерлерге жылдық 2,5% жеңілдікпен 5 796 шағын несие беруді жоспарлап отыр. Наурыз айында 761 өтінім келіп түсті, олардың басым бөлігі мал шаруашылығы саласындағы жобаларға қатысты. Бұл туралы АНК баспасөз қызметі хабарлады.

Мал шаруашылығына микронесие алуға 485 кәсіпкер өтінім берді. Тағы 191 – і қызмет көрсету саласын қаржыландыруға, 46 – сы саудаға, 22 – сі жеңіл өнеркәсіп саласына, 9 – ы ауыл шаруашылығы өнімдерін өңдеуге және 8-і өсімдік шаруашылығын жүргізуге өтінім берді.

Аккумулятордың ақпараты бойынша, микронесиелер 21 жастан 35 жасқа дейінгі жастарға өз ісін ашу немесе кеңейту үшін, бес жылдан аспайтын мерзіммен жеке кәсіпкер ретінде тіркелген жағдайда беріледі. Қатысушылардың жасы Аграрлық несие корпорациясына өтініммен жүгінген кезде ескеріледі.

Микронесиенің мөлшері 5 млн теңгеге дейін, ал қатысудың максималды мерзімі – мал шаруашылығы саласындағы жобалар үшін 7 жылға дейін және басқа мақсаттарға 5 жылға дейін болуы мүмкін. Номиналды сыйақы мөлшерлемесі - жылдық 2,5% - дан аспайды.

Микронесие алушылар үшін негізгі борыш пен сыйақыны өтеу бойынша жеңілдікті кезең беріледі, ол микронесие мерзімі ұзақтығының үштен бірінен аспайды. Кепілмен қамтамасыз етудің болуы міндетті шарт болып табылады: жылжымалы (мамандандырылған техника) және жылжымайтын мүлік. Кепіл берушіні (ата-аналарын, туыстарын және т.б.) тартуға жол беріледі.

Өтінім беру үшін АНК филиалына келесі құжаттарды ұсыну қажет:

1. жеке басын куәландыратын құжат;
2. жоба бойынша бизнес-жоспар;
3. шоттың болуы туралы қызмет көрсететін банктен анықтама;
4. несиелік берешектің, оның ішінде қаржы ұйымдарынан мерзімі өткен берешектің болуы туралы анықтама (несиелер болған кезде);
5. қатысушының/үміткердің жалақысын және (немесе) өзге де табыстарын растайтын құжат (жинақтаушы зейнетақы қорынан үзінді көшірме) болған кезде;
6. кепілді қамтамасыз ету ретінде берілетін мүлікті бағалау туралы есеп;
7. кепіл беруші және кепілмен қамтамасыз ету жөніндегі құжаттар.
   

Микронесиелер арнайы комиссияның шешімі негізінде беріледі, оның отырыстарында үміткерлер өздерінің бизнес-жобаларын таныстырады.

Қазіргі уақытта микронесиелер алуға өтінімдер 16 облыста және Астана, Алматы, Шымкент қалаларында қабылданады. Шығыс Қазақстан облысында өтінімдерді қабылдау жақын арада басталады.

"Аграрлық несие корпорациясы" АҚ филиалдарының мекенжайлары АНК сайтында көрсетілген.