Аграрлық несие корпорациясы ағымдағы жылдың 26 маусымына дейін "Қарыздарыңызды өсімпұлсыз өтеңіз" акциясын өткізеді.

Акцияға мерзімі өткен, оның ішінде сот шешімі бойынша өндіріп алынған берешегі бар несиелік серіктестіктер, тікелей қарыз алушылар және лизинг алушылар (заңды және жеке тұлғалар) қатыса алады. Акцияны өткізу кезеңінде қарыздарды өсімпұлсыз өтеуге болады, деп хабарлады АНК баспасөз қызметі.

Егер қарыз алушының несие беру туралы бірнеше шарттары немесе қаржылық лизинг шарттары болса, онда әрбір міндеттеме бойынша өсімпұл сомасын есептен шығару жеке-жеке жүзеге асырылады.

"Қарыз алушы немесе лизинг алушы несие беру туралы бір шарт (қаржы лизингі шарты) шеңберінде келесі төлемдерді толық өтеген кезде ғана өсімпұлды есептен шығаруға болады: мерзімі өткен сыйақы сомасы, мерзімі өткен негізгі борыш сомасы, мерзімі өткен негізгі борышқа есептелген сыйақы сомасы, айыппұл сомасы", - деп түсіндірді Аграрлық несие корпорациясында.

Акцияға тек бір рет қатысуға болады. Қарызды өсімпұлсыз өтеу үшін Аграрлық несие корпорациясының банктік шоттарына 26 маусымға дейін ақша аудару қажет.