Аграрлық сектордағы инвестициялық жобаларды дамыту үшін 2025 жылы Аграрлық несие корпорациясы (АНК) және "ҚазАгроҚаржы" арқылы 1,5 трлн теңге мөлшерінде қаржыландыру жіберілетін болады. Қаражат көктемгі егіс және егін жинау жұмыстарын жүргізуге, инвестициялық жобаларды іске асыруға, негізгі құралдарды сатып алуға және айналым қаражатын толықтыруға, ауыл шаруашылығы техникасы лизингісіне жұмсалады. Бұл туралы үкіметтің баспасөз қызметі хабарлады.
Несиелеудегі басымдық келесі жобаларға беріледі:
● ауыл шаруашылығы өнімдерін қайта өңдеу және азық-түлік өнімдерін өндіру (әлеуметтік маңызы бар азық-түлік өнімдеріне басымдық)
● суаруды дамыту (жаңбырлату қондырғылары, суару құрылыстары, тамшылатып суару)
● өнеркәсіптік жылыжайлар
● инфрақұрылымды дамыту (орау, сақтау, тасымалдау)
● өнеркәсіптік ауқымда жемшөп өндірісін дамыту.
Жобаларды қамтуды ұлғайту үшін АНК арқылы несиелеу лимиттері 7-ден 15 млрд теңгеге дейін ұлғайтылады. Сондай-ақ, "Бәйтерек" Кепілдік қорының, "Даму" кепілдіктерінің АНК ірі ұзақ мерзімді жобаларына қолданылуы жүреді, Қазақстанның Экспорттық-Несиелік агенттігінің ауыл шаруашылығы өнімдерінің экспортын қолдауға арналған мандаты кеңейтіледі.
Бұдан басқа, "Бәйтерек" Холдингі құс фабрикаларының пулын қалыптастырады, сондай-ақ ауыл шаруашылығы өндірушілері үшін экспорттық мүмкіндіктерді кеңейтуді жалғастыруда.
Атап айтқанда, Малайзиямен жаңа өткізу нарықтарын игеру, сондай-ақ астық экспортының көлемін $200 млн-ға дейін ұлғайтуға мүмкіндік беретін жаңа сауда қорын құру жөнінде келіссөздер жүргізілуде. Ұзақ мерзімді перспективада бұл көрсеткішті $1 млрд дейін арттыру жоспарлануда.
"Экспорттық стратегия шеңберінде отандық өндірушілер үшін сақтандыру, қайта сақтандыру және кепілдіктер құралдары кеңейтілуде. Жаңа нарықтарға шығу және қазақстандық экспорт үшін кешенді шешімдер ұсыну маңызды міндетке айналды. Осыған байланысты "Бәйтерек" сауда қорын іске қосады және құс шаруашылығы кәсіпорындары мен өсімдік шаруашылығын дамытуды қоса алғанда, экспортқа бағдарланған жобалар пулын қалыптастырады", - деп хабарлады үкіметте.
