Аграрлық несие корпорациясы және ҚазАгроҚаржы ("Бәйтерек" холдингінің еншілес және тәуелді компаниялары) биыл қолайсыз ауа-райынан зардап шеккен қарыз алушылар мен лизинг алушылар - фермерлерден міндеттемелерді құрылымдауға өтінімдер қабылдауда. Бұл туралы "Бәйтерек" баспасөз қызметі хабарлады.
"Қазіргі уақытта 884 ауыл шаруашылығы өндірушілерінен 42,5 млрд теңгеге өтінім қарауға келіп түсті, оның ішінде 27 млрд теңгеге 675 өтінім мақұлданды. АНК және ҚАҚ филиалдарының қызметкерлері осы мәселелер бойынша кеңес береді, өтініш берушінің нақты жағдайын талдауды ескере отырып, міндеттемелерді ұзартуға өтінімдерді жеке тәртіппен қабылдайды және қарайды", - деп хабарлады холдингте.
Бұдан басқа, қазір АНК мен ҚАҚ-да қарыз және қаржы лизингі шарттары бойынша ақшалай міндеттемелерді уақтылы орындамағаны үшін 100% мөлшерінде тұрақсыздық айыбын есептен шығару науқаны жұмыс істейді. Қазіргі уақытта 1,4 мың қарыз алушы үшін 82 млн теңгеге жуық сомаға тұрақсыздық айыбы есептен шығарылды.
Сондай-ақ, биылғы жылы "Бәйтеректе" өсімдік шаруашылығында ерікті сақтандыру шарттарын жасасқан ауыл шаруашылығы өндірушілері құрғақшылық пен жауын-шашынның салдарынан шамамен 3,8 млрд теңгеге сақтандыру төлемдерін алды. Фермерлер үшін сақтандыру өнімдерінің қолжетімділігі сақтандыру сыйлықақысы сомасының 80% субсидиялаумен қамтамасыз етіледі (АНК субсидиялау жөніндегі оператор болып табылады).
