Бәйтерек дала жұмыстарын қаржыландыруды 300 млрд теңгеге ұлғайтады

"Бәйтерек" холдингі 300 млрд теңгеге көктемгі егіс және егін жинау жұмыстарын жеңілдетілген қаржыландырудың жаңа бағдарламасын іске қосуда. Бұл туралы холдингтің баспасөз қызметі хабарлады.

Алғаш рет "Даму" кәсіпкерлікті дамыту қоры осы бағдарлама шеңберінде кепілмен қамтамасыз ету бойынша шектеулерге тап болған фермерлер үшін несиенің 85% сомасына кепілдік береді. Жаңа бағдарлама 2024 жылдың 29 сәуірінен бастап жұмыс істей бастайды.

"Биыл "Бәйтерек" холдингінің дала жұмыстарын қаржыландырудың жалпы көлемі 440 млрд теңгеге жетеді. Бұл бағытта холдинг агроөнеркәсіптік кешенді қолдау үшін нарықтық ресурстарды барынша пайдалана отырып, нарық пен екінші деңгейдегі банктердің қаражатын айналымға белсенді тартуда", - деп хабарлады баспасөз қызметінде.

Егіс және егін жинау жұмыстары Аграрлық несие корпорациясы арқылы бір жылға дейінгі мерзімге соңғы қарыз алушы үшін жылдық 5% шартпен қаржыландырылып жатыр.

"Холдинг агроөнеркәсіптік кешенді белсенді қолдайды және осы саланы қаржыландыру көлемін тұрақты негізде арттыратын болады. Мемлекет басшысының экономикалық өсу қарқынын 6%-ға дейін ұлғайту және ауыл шаруашылығын қаржыландыру көлемін ұлғайту жөніндегі тапсырмасына сәйкес 2024 жылы АӨК субъектілері үшін көктемгі егіс және егін жинау жұмыстарын жеңілдетілген қаржыландыруға 140 млрд теңге бөлінді. Алайда, бұл сома фермерлердің айналым қаражаттарына деген қажеттіліктерін қанағаттандыру үшін жеткіліксіз болды. Осыған байланысты біз нарықтық қарыз қаражатын қосымша тарту туралы шешім қабылдадық", — деді "Бәйтерек" холдингінің басқарма төрағасы Рустам Қарағойшин.