Құс шаруашылығы нарығындағы кедергілерді БҚДА анықтады

Бәсекелестікті қорғау және дамыту агенттігі құс еті нарығындағы бәсекелестіктің жай-күйін талдап, жүйелі шешуді қажет ететін негізгі мәселелерді анықтады.

"Талдау көрсеткендей, осы нарықта тарифтік квоталарды бөлу біркелкі емес: квоталардың 90% тарихи жеткізушілер алады, ал жаңа қатысушыларға тек 10% ғана беріледі. Бұл бәсекелестікті шектейді және нарықтың жаңа қатысушыларының пайда болуына жол бермейді", - деп хабарлады БҚДА баспасөз қызметі.

Сондай-ақ, 2023 жылы тауық еті өндірісінің 12%-ға өсуіне қарамастан, ішкі нарықта тұтыну қажеттілігі өз өндірісімен 66%-ға қамтамасыз етілетіні атап өтілді. Импортқа тәуелділік 34% деңгейінде сақталады.

"Бұл жағдайдың негізгі себебі өнімнің жоғары құны болып қала береді, мұнда 68% импорттық компоненттер бағасының ауытқуына ұшыраған жемшөп есебінен қалыптасады. Сонымен қатар, өндірушілер үшін қосымша кедергі субсидиялардың кешігуі болып табылады, бұл олардың қаржылық тұрақтылығына және өндірісті кеңейту мүмкіндігіне теріс әсер етеді", - деп хабарлады Агенттікте.

Талдау нәтижелері бойынша БҚДА бәсекелестікті дамытуға ықпал ететін жүйелі шараларды қабылдау үшін уәкілетті органдарға ұсыныстар берді. Олардың ішінде - субсидиялар туралы хабарлау процестерін автоматтандыру, оларды бөлу өлшемшарттарын қайта қарау, нарыққа қатысушыларды кемсітуді болдырмау, мемлекеттік қолдау шараларын ұсыну мерзімдерінің сақталуын бақылауды күшейту.