Қостанай облысында алдағы үш жылда ауыл шаруашылығы өнімдерін өңдеуге 112 млрд теңгеден астам инвестиция салу жоспарлануда. Атап айтқанда, "Аруана-2010" ЖШС бидайды өңдеу қуатын кеңейтеді. Бұл туралы облыс әкімінің баспасөз қызметі хабарлады.
"Жыл сайын біз шамамен 5 млн тонна бидай өндіреміз, бұл елдегі барлық астық көлемінің төрттен бірін құрайды. Оның 45% қайта өңдеуге кетеді", - деді Қостанай облысының әкімі Құмар Ақсақалов.
Өсімдік шаруашылығы өнімдерін қайта өңдеу саласында өңірде 160 кәсіпорын жұмыс істейді, оның ішінде жалпы қуаты жылына 2 млн тоннаға жуық 37 ұн тартатын кәсіпорын бар. Өндірілген ұнның шамамен 70% экспортталады.
Облыстың ірі ұн тарту кәсіпорындарының бірі "Аруана-2010" ЖШС болып табылады. Кәсіпорын жаңа диірмен кешенін салады, бұл зауыттың жалпы өндірістік қуатын жылына 175 мың тоннаға дейін арттырады. Жаңа жобаның құрылысына инвестициялар 3 млрд теңгені құрайды. Бұл жоба қосымша 100 жұмыс орнын ашады, өнім өндіру мен экспорттау көлемін арттырады, бұл өңірдегі қайта өңдеу үлесін, сондай-ақ бюджетке түсетін салық түсімдерінің сомасын жылына 200 млн теңгеден астам ұлғайтуға мүмкіндік береді.
Облыс әкімінің айтуынша, алдағы үш жылда ауыл шаруашылығы өнімдерін өңдеуге 112 млрд теңгеден астам инвестиция салу жоспарланып отыр, 15 жоба іске асырылатын болады.
