Абай облысында 4 мыңнан астам мал айыппұл тұрағына орналастырылды

Абай облысында жыл басынан бері айыппұл тұрағына қараусыз қалған 4 мыңнан астам ауыл шаруашылығы жануарлары орналастырылды. Бұл туралы полиция департаментінің баспасөз қызметі хабарлады.

Ведомствода қараусыз қалған мал жол-көлік оқиғаларын тудыруы мүмкін екенін еске салды. Сондықтан облыста күн сайын ауыл шаруашылығы жануарларын жаю қағидаларының талаптарын сақтау туралы халықпен түсіндіру жұмыстары жүргізіледі.

"Еріп жүретін адамдарсыз қозғалатын ауыл шаруашылығы жануарлары қараусыз болып саналады және иесі анықталғанға дейін уақытша ұстау орындарына айдалады", - деп ескертті полицияда.

Абай облысының аумағында 110 айыппұл тұрағы жұмыс істейді. Ағымдағы жылдың 8 айында иелері қараусыз қалдырған 4 820 бас ауыл шаруашылығы жануарлары уақытша ұстау үшін арнайы бөлінген орындарға орналастырылды. Мал жаю ережелерін бұзғаны үшін 2 289 адам әкімшілік жауапкершілікке тартылды.