Қазақстанда аграрлық секторды индустрияландыру бойынша белсенді жұмыс жүргізілуде. Үш жыл ішінде АӨК-дегі өңделген өнімнің үлесін 70% - ға дейін арттыру міндеті қойылды. Бұл туралы Қазақстан президенті Қасым-Жомарт Тоқаев бүгін Қазақстан мен Ресейдің ХІХ Өңіраралық ынтымақтастық форумының отырысында сөйлеген сөзінде айтты.
"Бұл міндетті орындау үшін әлеуметтік маңызы бар азық-түлік тауарлары бойынша импортқа тәуелділікті төмендетуге бағытталған ірі инвестициялық жобалар іске асырыла бастады. Алдағы жылдары 115 тауарлы сүт фермасы салынады, бұл сүт өндіру көлемін 600 мың тоннаға арттыруға мүмкіндік береді. Жылына 120 мың тоннадан астам ет өндіретін 15 ірі құс фабрикасын саламыз. Алдағы бес жылда Қазақстан агросекторда жалпы сомасы 2,7 трлн теңгеге 900-ге жуық инвестициялық жобаны іске асыруды жоспарлап отыр. Озық халықаралық стандарттарға, оның ішінде Халал стандарттарына сәйкес келетін бәсекеге қабілетті, экологиялық және экспортқа бағдарланған өнімді шығару басымдыққа ие", - деді Қасым-Жомарт Тоқаев.
Ол сондай-ақ климаттың өзгеруі мен сумен қамтамасыз ету мәселелеріне назар аударды. Қазақстанда су секторын жаңғырту басталды. 20 жаңа су қоймасын салу және кемінде 15 жұмыс істеп тұрған су қоймасын реконструкциялау, 3500 шақырымнан астам каналды жаңғырту және цифрландыру жоспарлануда.
"Бұл 2027 жылға қарай қосымша 2 текше километрге жуық сумен қамтамасыз етуге мүмкіндік береді. Қазақстанда су ресурстарының тапшылығын төмендетуге бағытталған жаңа Су кодексі әзірленуде. Ресеймен бірлесіп Жайық, Ертіс ірі өзендерінің бассейндерінде зерттеулер жүргізу бойынша ынтымақтастықты жандандырудың бірыңғай жол картасы іске асырылуда. Мұндай күрделі мәселені тек бір елдің күшімен шешу мүмкін емес екенін атап өткім келеді. Бұл мәселені мүдделер теңгерімін сақтап, бірлесіп әрекет ету арқылы шешу керек. Осы мүмкіндікті пайдалана отырып, біздің Ресеймен стратегиялық әріптестік қарым-қатынасымыз екі ел халықтарының мүддесі үшін су ресурстарын бірлесе ұтымды пайдалануға теңгерімді тәсілдің кепілі болатынына сенімдімін", - деп атап өтті Қасым-Жомарт Тоқаев.
