"ЕвроХим" компаниясы қытайлық China National Engineering Company (CNCEC) компаниясымен Жамбыл облысында минералды тыңайтқыштар өндіру саласында бірлескен жобаны іске асыру туралы келісімшартқа қол қойды. Бұл туралы ҚР өнеркәсіп және құрылыс министрлігінің баспасөз қызметі хабарлады.
Қол қою рәсімінде өнеркәсіп министрі Қанат Шарлапаев атап өткендей, қол қойылған келісімшарт Жаңатаста химиялық кешенді жобалауды, салуды және пайдалануға беруді қамтиды. Минералды тыңайтқыштар өндіретін зауыттың жоспарланған қуаты жылына кемінде 1 млн тоннаны құрайды.
ЕвроХим компаниясының Қазақстандағы инвестициялық жобасы үш кезеңде іске асырылуда, ал химиялық кешен құру – қорытынды қадам. Инвестициялардың жалпы көлемі - 1 млрд доллар, сондай-ақ кәсіпорын 2400 жаңа жұмыс орнын қамтамасыз етеді.
"Азық-түлік қауіпсіздігі жердің немесе судың болуынан басталмайды. Бұл оның негізгі іргетасы, бірақ шынымен де азық-түлік қауіпсіздігімен қамтамасыз ету үшін міндетті түрде тыңайтқыштар қажет. Сондықтан бұл біз үшін маңызды жоба. Біз оны ЕвроХим және қытайлық серіктестермен бірге жүзеге асырамыз. Бұл ең жақсы түрдегі үлкен Еуразиялық кооперацияның үлгісі. Өңірлік азық-түлік қауіпсіздігі үшін бұл өте үлкен оқиға", - деп атап өтті Қанат Шарлапаев.
Өнеркәсіп министрлігі инвестициялық жоба индустрияландырудың Бірыңғай картасына және Қазақстан мен Ресей үкіметтері арасындағы Келісімге сәйкес жүзеге асырылып жатқанын атап өтті.
