Фермерлер күнбағыс тұқымын әкетуге шектеулерді алып тастауды сұрайды

Шығыс Қазақстан облысының аграрлары күнбағыс тұқымын әкету кезінде кедендік баж салығын алып тастауды сұрайды. Бұл туралы "Атамекен" Ұлттық кәсіпкерлер палатасында хабарлады.

"Өздеріңіз білетіндей, Шығыс Қазақстан облысы майлы дақылдарды өсіру және оларды терең өңдеу бойынша көшбасшылардың бірі болып табылады. Бірақ біздің аграрларымыз үшінші жыл тыйым салу, шектеулер, түрлі квоталар мен баждар аясында өмір сүріп келеді", – деді Өңірлік кәсіпкерлер палатасының агроөнеркәсіптік кешен бөлімінің бастығы Данияр Әкімбаев.

2023 жылғы 4 ақпаннан бастап Қазақстанда күнбағыс экспортына тоннасына 20% немесе 100 еуро мөлшерінде кедендік баж қолданылады. Бұл норма бизнеске қосымша жүктеме береді және фермерлердің қалтасына қатты соққы береді. Фермерлерге экспорттық баждың орнына күнбағыс тұқымын шетелге сатуға сандық квота белгілеуге уәде берілді, бірақ бұл орындалмады.

"Ақпан айының басынан бастап ШҚО Кәсіпкерлер палатасына осы мәселе бойынша кәсіпкерлерден 10-нан астам өтініш келіп түсті. Біз проблеманы АӨК және тамақ өнеркәсібі кеңесінің қарауына шығардық, ұсынымдар жинадық және бизнес ұсыныстарын ауыл шаруашылығы министрлігіне жібердік, бірақ жауап алған жоқпыз", - деді Данияр Әкімбаев.

Ақпан айында премьер-министрдің орынбасары-сауда және интеграция министрі Серік Жұманғариннің Шығыс Қазақстан облысына сапары кезінде сыртқы экономикалық қызметтің тауар номенклатурасына өзгерістер енгізуді қарастыру туралы хаттамалық шешім шығарылды. Атап айтқанда, "Егіс бірліктеріндегі күнбағыс тұқымдары" тауарына және кейіннен ауыл шаруашылығы дақылдары тұқымдарының барлық түрлеріне СЭҚ ТН жеке кодын беру ұсынылды. Бірақ ешқандай өзгеріс болған жоқ.

"Біз сондай-ақ өз ұсыныстарымызды "Атамекен" ҰКП орталық аппаратына жолдадық және олар республикалық ведомствоаралық комиссия отырысының күн тәртібіне енгізілді. Алайда бұл отырыс ешқашан болған емес", - дейді Данияр Әкімбаев.

Шығыс Қазақстанның барлық аграрларының атынан ШҚО Кәсіпкерлер палатасы уәкілетті органдарды бұл мәселені үкімет деңгейінде тағы бір рет қарауға және отандық өндірушілердің пайдасына объективті шешім қабылдауға шақырады.