Фермерлер тыңайтқышты бөліп төлеу арқылы ала алады

Ағымдағы аграрлық маусымда Қазақстанда шамамен 1,5 млн тонна тыңайтқыш енгізу жоспарлануда, бұл ғылыми қажеттіліктің 46% құрайды. Тыңайтқыштарды қолдануды арттыру үшін мемлекет қосымша ынталандыру шараларын қабылдады. Бұл туралы үкімет отырысында ауыл шаруашылығы министрі Айдарбек Сапаров хабарлады.

"Сыбайлас жемқорлық тәуекелдерін болдырмау үшін бүгінгі күні отандық тыңайтқыштарды аванстық субсидиялау көзделген, онда субсидияларды отандық өндіруші зауыттар тікелей алатын болады. Бұл субсидиялаудың мүлдем жаңа тетігі, онда аграрлар алдын ала арзандатылған тыңайтқыштармен қамтамасыз етілетін болады", - деді Айдарбек Сапаров.

Ол сондай-ақ аграрлардың ағымдағы қаржылық жағдайын ескере отырып, қазіргі уақытта зауыттармен әкімдіктердің кепілдігімен тыңайтқыштарды бөліп-бөліп беру мәселесі пысықталып жатқанын атап өтті.

АШМ деректері бойынша бүгінгі таңда аграрларға 147,5 мың тонна тыңайтқыш жөнелтілді, сондай-ақ 173,4 мың тоннаға шарттар жасалды.

"Бұл бағыттағы белсенді жұмыс тек Солтүстік Қазақстан (73,9 мың тонна) және Қызылорда (52,8 мың тонна) облыстарында жүргізілуде. Осыған байланысты, облыс әкімдіктері бұл мәселені бақылауға алып, фермерлерді тыңайтқышпен қамтамасыз ету бойынша жұмысты жеделдету қажет", - деп атап өтті АШМ басшысы.

Минералды тыңайтқыштарды субсидиялау бағдарламасына биыл жергілікті бюджеттерде 34,3 млрд теңге, сондай-ақ пестицидтерді субсидиялауға - 33,8 млрд теңге қарастырылған.