Жамбыл облысының фермерлері суды үнемдейтін технологияларға несие алады

Жамбыл облысында су үнемдеу технологияларын енгізу "Ауыл аманаты" жобасы шеңберінде жүргізілетін болады. Осы мақсатта ауыл шаруашылығы өндірушілері жеңілдікті несие ала алады.

Облыс әкімінің баспасөз қызметінен хабарлағандай, бүгінде облыста суармалы жер көлемі 181,8 мың га құрайды. Оның ішінде 107 мың гектар жер нормативтерге сәйкес суармалы сумен қамтамасыз етілген. Өткен жылы су үнемдеу технологиялары 57,2 мың гектар алқапқа енгізілді, биыл бұл көрсеткішті 65,8 мың гектарға, 2030 жылға дейін 92 мың гектарға жеткізу жоспарлануда.

Ауыл шаруашылығы басқармасы басшысының орынбасары Шәкір Момынқұловтың айтуынша, тамшылатып суару жүйесін немесе жаңбырлату қондырғыларын сатып алуды жоспарлап отырған шаруашылықтарға да 50% көлемінде субсидия төленетін болады.