Ақтөбеде Ақтөбе ауыл шаруашылығы тәжірибе станциясының базасында қазақ жылқы шаруашылығы және жемшөп өндіру ғылыми-зерттеу институты құрылды. Институттың құрылтайшысы Ұлттық аграрлық ғылыми-білім беру орталығы болып табылады, деп хабарлады АШМ-нің баспасөз қызметі.
Жылқы шаруашылығы және жем-шөп өндіру ҒЗИ жылқылардың асыл тұқымдық қасиеттерін жақсартуға, жылқы шаруашылығын белсенді дамытуға және отандық тұқымдарды шетелдік нарықтарға жылжытуға бағытталған ғылыми-зерттеу жұмыстарын жүргізетін болады. Бүгінгі таңда институт алдағы бес жыл ішінде асыл тұқымды жылқылардың санын 6-7%-ға көбейту міндетін алға қойып отыр.
"Қостанай және Адай сияқты жергілікті жылқы тұқымдарын, сондай-ақ жоғары өнімді Мұғалжар және Көшім генотиптерін және ет-сүт бағытындағы Бақа типіндегі қазақ жылқыларын өсіру ареалдарын кеңейту селекциялық-асыл тұқымдық жұмыс үшін маңызды міндетке айналуда. Ол үшін жылқылардың әртүрлі генетикалық топтары, тұқым және эмбрион банкі туралы мәліметтерді сақтайтын ақпараттық деректер банкін құру, биелерді қолдан ұрықтандыру пункті бар иммундық генетика зертханасын салу жоспарлануда. Сондай-ақ жылқы өсіруші мамандарды даярлау бойынша жұмыстар жүргізілетін болады", - деп хабарлады АШМ-де.
Сонымен қатар, жылқыларға арналған мамандандырылған ветеринарлық клиника құру жоспарлануда. Бұл ветеринарлық қызмет деңгейін едәуір арттырады және жылқылардың денсаулығы мен әл-ауқатын жақсартуға көмектеседі.
ҒЗИ сонымен қатар қазақстандық жылқы шаруашылығына озық тәжірибелерді енгізу және оны халықаралық аренада бәсекеге қабілетті ету үшін шетелдік ғылыми-зерттеу орталықтарымен, университеттермен және халықаралық стандарт зертханаларымен бірлескен жұмыс жүргізетін болады.
