КАҚ 20 ақпанда ауылшаруашылық техникасының лизингін бастайды

ҚазАгроҚаржы 20 ақпанда ауыл шаруашылығы техникасы лизингінің үш жеңілдікті бағдарламасы бойынша өтінімдерді қабылдай бастайды. Аталған бағдарламаларды қаржыландыруға 10,5 млрд теңге бөлінді, деп хабарлады ҚАҚ баспасөз қызметі.

Қаржыландыру келесідей бөлінеді:

• "Өз жем-шөбім" бағдарламасы - 3 млрд теңге;
• "Қазақстанда жасалған" бағдарламасы - 5 млрд теңге;
• "6%-бен жеңілдікті лизинг" бағдарламасы - 2,5 млрд теңге.

"Қазақстанда жасалған" бағдарламасы бойынша аграрлар аспалы, тіркемелі және өздігінен жүретін ауыл шаруашылығы техникасын, сондай-ақ отандық өндіріс және құрастыру көлік құралдарын 10 жылға дейінгі мерзімге жылдық 6% мөлшерлемемен сатып ала алады. Аванс лизинг нысанасы құнының кемінде 15% құрайды.

"Өз жем-шөбім" бағдарламасы қазақстандық және шетелдік өндірістің жем-шөп дайындау техникасы мен ұтқыр суару жүйелерін қаржыландыруға бағытталған. Мұнда да мөлшерлеме 10 жылға дейінгі мерзімге жылдық 6%, аванс - кемінде 15% құрайды.

"Жеңілдікті лизинг" бағдарламасы фермерлерге 6% мөлшерлеме бойынша 10 жылға дейінгі мерзімге аванссыз отандық өндірістің/құрастырудың өздігінен жүретін ауыл шаруашылығы техникасын жеңілдікті шарттармен сатып алуға мүмкіндік береді.

"Жеңілдікті лизинг бағдарламалары біздің клиенттерімізде үлкен сұранысқа ие. Сондықтан, қолма-қол ақшаның бос қалдығы пайда болғаннан кейін біз оларды дәл осы үш лизинг бағдарламасына - "Қазақстанда жасалған", "Өз жем-шөбіміз" және "Жеңілдікті лизинг" бағыттау туралы шешім қабылдадық. Сонымен қатар, қазір алдағы егіске дайындалуды бастау өте жақсы уақыт", - деді ҚазАгроҚаржы Басқарма төрағасының орынбасары Еркебұлан Жұмжаев.

Өтінімдерді қабылдау 20 ақпанда, сағат 15.00 - де Telegram-бот арқылы басталады. Өтінім бергеннен кейін бес жұмыс күні ішінде "ҚазАгроҚаржы" АҚ филиалына құжаттардың толық пакетін ұсыну қажет.