Қазақстанда ауыл шаруашылығы санағы қалай өтеді

Пилоттық ауыл шаруашылығы санағы 2024 жылғы 20 тамыз бен 30 қыркүйек аралығында 54 елді мекенде – ауылдық және қалалық жерлерде өтеді. Санақты Ұлттық статистика бюросының аумақтық бөлімшелерінің қызметкерлері жүргізеді. Негізгі сессияны өткізу 2025 жылға жоспарланған.

"Пилоттық ауыл шаруашылығы санағының мақсаты санақ парақтарын, әдіснамаларды, ақпараттық жүйелер мен бағдарламалық қамтамасыз етуді сынақтан өткізу, далалық жұмыстарды ұйымдастыруды бағалау, сондай-ақ интернет - қамту мен әкімшілік деректердің сапасын бағалау болып табылады", - деп хабарлады Ұлттық статистика бюросында.

Санақ заңды тұлғалар мен олардың құрылымдық бөлімшелері, шаруа және фермер қожалықтарын қоса алғанда, жеке кәсіпкерлер, сондай-ақ ауыл шаруашылығы қызметін жүзеге асыратын үй шаруашылықтары арасында жүргізілетін болады.

Ұлттық бюрода атап өткендей, халық санағы жер және егіс алқаптары, ауыл шаруашылығы жануарлары мен құстарының саны, ауыл шаруашылығы техникасы мен жабдықтары, сондай-ақ ауыл шаруашылығы инфрақұрылымына қатысты басқа да аспектілер туралы деректерді өзектендіруге мүмкіндік береді.

"Пилоттық ауыл шаруашылығы санағы бізге таңдалған әдіснаманың дұрыстығына және ақпараттық жүйелердің дайындығына көз жеткізуге мүмкіндік беретін 2025 жылғы негізгі ауыл шаруашылығы санағына дайындықтың маңызды кезеңі болып табылады", – деп атап өтті Ұлттық статистика бюросы басшысының орынбасары Әсел Шауенова.