Қазақстан мен Қытай ауыл шаруашылығы жөніндегі Кіші комитет құрмақ

Қазақстан мен Қытай ауыл шаруашылығы жөніндегі бірлескен Кіші комитет құрады: жұмыс органы АӨК-тің өзекті мәселелерін жедел қарайтын және екі ел арасындағы саладағы ынтымақтастықты тиімді дамытатын болады. Бұл туралы ҚХР Ауыл шаруашылығы және ауылдық істер министрінің орынбасары Ма Юсянмен кездесу барысында ҚР АШМ басшысы Ербол Қарашөкеев мәлімдеді.

ҚР Ауыл шаруашылығы министрлігінің баспасөз қызметінен хабарлағандай, Ербол Қарашөкеев ҚХР уәкілетті мемлекеттік органдарының басшыларына тиімсіз сауда тәсілдерін қайта қарауды және бүкіл аумақпен экспортты шектемей, эпизоотиялық қауіпсіздік бойынша екі елдің аймақтандырылуын тануға көшуді ұсынды. Атап айтқанда, министр бұл мәселеде ШҰАР басшылығының қолдауына ие болды.

Ма Юсянмен кездесуде Ербол Қарашөкеев Дүниежүзілік жануарлар денсаулығы ұйымы Қазақстанның 5 аймағын (Шығыс Қазақстан, Алматы, Түркістан, Қызылорда, Жамбыл, сондай-ақ Жетісу және Абай облыстары) вакциналарды қолдана отырып, аусыл бойынша қолайлы деп танығанын хабарлады. Ол сондай-ақ жоғарыда аталған аймақтардан ет экспортын жаппаған Парсы шығанағы елдерінің тәжірибесін атап өтті.

Министр жақын арада ҚХР-ға мұздатылған ет жеткізу қайта басталады, сондай-ақ ветеринариялық талаптарды және салқындатылған сиыр, қой, шошқа еті, ірі қара терісі мен қосалқы өнімдерге арналған хаттамалардың жобаларын қарау бойынша келіссөздер басталады деген үмітін білдірді.

Ауыл шаруашылығы министрлігінің өкілдері құс еті мен құс шаруашылығы өнімдерін экспорттау жөніндегі талаптарды келісу бойынша жұмысты қайта бастауды талқылады. Өткен жылы Қазақстанда құс тұмауының өршуі болған жоқ. Ел бұл вирусқа қарсы вакцинация жүргізілетін бірнеше республикалардың бірі.

Келіссөздер үстелінде қарастырылған тағы бір тақырып Қытайдың Шығыс Қазақстан облысына зертханалық жабдықтарды жеткізу мәселесі болды. Ербол Қарашөкеев Қытай тарапына Қазақстанның ҚХР-мен шекаралас басқа өңірлері үшін де осындай жабдықты ұсыну мүмкіндігін қарастыруды ұсынды.

ҚР АШМ деректері бойынша жыл басынан бері ҚР мен ҚХР арасындағы аграрлық өнімнің тауар айналымы бір жыл бұрынғы кезеңмен салыстырғанда 58% - ға ұлғайып, 265,5 млн доллар құрады.