Қазақстанда агроөнеркәсіптік кешенді дамыту және су ресурстарын басқару бойынша израильдік тәжірибені қолдану перспективаларын ҚР премьер-министрі Әлихан Смайылов пен "Израиль-Қазақстан" Сауда-өнеркәсіп палатасының төрағасы Михаэль Роэ талқылады. Бұл туралы Үкіметтің баспасөз қызметі хабарлады.
Әлихан Смайылов атап өткендей, ҚР Үкіметі Израильмен әріптестікті кеңейтуге және көпжақты өзара тиімді қарым-қатынастарды нығайтуға үлкен мән береді. Атап айтқанда, елдің ауыл шаруашылығы саласындағы көрнекті жетістіктері қызығушылық тудырады.
"Біз израильдік технологияларды зерделеуге ашықпыз және оларды АӨК дамуына серпін беру үшін тартуға дайынбыз. Ирригация және суды үнемдеу мәселелері де өте өзекті. Біз мемлекет салған қаражаттың тиімділігін арттырғымыз келеді және нақты нәтижелерге қол жеткізуді көздейміз", — деді премьер-министр.
Сонымен бірге, ол әр деңгейде қажетті түзетулер енгізу үшін бүкіл өндірістік циклды ескеру маңызды екенін айтты.
"Мұның бәрін кешенді түрде қарау керек: мемлекеттен қандай қолдау шаралары болуы керек, ғылымнан, білімнен және өнеркәсіптен не болуы керек. Мысалы, агрегаттарды, машиналарды және басқа жабдықтарды жергілікті құрастыру. Біз осы бағыттарда бірлесіп жұмыс істеуге дайынбыз", - деп атап өтті Әлихан Смайылов.
Өз кезегінде Михаэль Роэ Қазақстанның ішкі нарықтың қажеттіліктерін толығымен жабуға әлеуеті бар екенін және АӨК-ті дамытудың кешенді тәсілінің көмегімен жаһандық азық-түлік қауіпсіздігін қамтамасыз етуге аса зор үлес қоса алатынын атап өтті.
Ол мемлекет басшысының ауыл шаруашылығы саласындағы Жолдауын іске асыру шеңберінде израильдік агротехнологиялар мен су ресурстарын басқару әдістерін қолдануға кешенді жәрдем көрсетуді ұсынды.
Кездесу қорытындысы бойынша жақын арада барлық айтылған мәселелер бойынша тәжірибе алмасуды және бірлескен жұмысты ұйымдастыру туралы уағдаластыққа қол жеткізілді.
