Қазақстан 12 млн тонна астық экспорттауы мүмкін

Қазақстанның дәнді дақылдар бойынша экспорттық әлеуеті ағымдағы жылы 12 млн тоннаны құрайды. ҚР президенті Қасым-Жомарт Тоқаев үкіметке осы өнімді экспорттауда бизнеске қолдау көрсетуді тапсырды.

"Үкіметтің басым міндеті - фермерлерге өз өнімдерін шетелдік нарықтарда өткізуде жан-жақты қолдау көрсету. Біздің экспорттық әлеуетімізді арттыру үшін әлемдік нарықта сұранысқа ие жоғары рентабельді дақылдарды көбірек өсіру қажет", - деді мемлекет басшысы Ауыл шаруашылығы қызметкерлерінің бірінші форумында сөйлеген сөзінде.

Сонымен қатар, ол ішкі нарықтың мүмкіндіктерін толық пайдалану қажет екенін атап өтті. Президенттің айтуынша, Алматы, Астана және Шымкент қалаларына іргелес өңірлердің фермерлері алдында үлкен перспективалар ашылуда.

"Астананың "азық-түлік белдеуі" мәртебесіне сәйкес келетін Ақмола облысы жақсы мысал бола алады. Биыл өңірдегі ауыл шаруашылығы өндірісінің жалпы көлемі екі есеге артты. Бұл өте жақсы нәтиже. Ірі өткізу нарықтары бар қалаларға іргелес басқа аймақтар да осы бағытта жұмыс істеуі керек. Қазақстанда азық-түлік өнімдерінің көп мөлшері өндіріледі. Халық арасында оларға сұранысты ынталандыра отырып, отандық тауарларды кеңінен ілгерілету қажет", - деді Қасым-Жомарт Тоқаев.