Қазақстан Қытайға астық экспортын 1 млн тоннаға дейін жеткізуге ниетті

Қазақстан Қытайға астық жеткізуді жылына 1 млн тоннаға дейін арттыруды жоспарлап отыр. Бұл туралы "Азық-түлік корпорациясы" ҰК төрағасының орынбасары Самат Тенбаев Орталық коммуникациялар қызметінде өткен брифингте мәлімдеді.

Самат Тенбаев соңғы уақытта Қазақстан үшін дәстүрлі экспорт нарықтарында бәсекелестік айтарлықтай өскенін атап өтті. Бірінші кезекте, Қазақстан жыл сайын шамамен 5 млн тонна астық жеткізетін Орталық Азия нарықтары туралы сөз болып отыр.

"Қазір ҚХР нарығын игеру бойынша жұмыстар белсенді жүргізілуде. Бұл нарықтағы негізгі тежегіш нашар дамыған инфрақұрылым болды. Ағымдағы жылдың 6 айында өткізу қабілеті астық нарығының барлық қатысушыларынан 0,5 млн тонна астықты құрады. Жақындағы мақсат -1 млн тоннаға дейін жеткізу. Әрине, ОА базарлары, біздің жақын көршілеріміз үшін күресу керек", - деді Азық-түлік корпорациясының өкілі.

Өз кезегінде ҚР АШМ Агроазық-түлік нарықтары және ауыл шаруашылығы өнімдерін қайта өңдеу департаменті директорының м.а. Шаймерден Ахметов Қазақстанның ағымдағы жылы құрғақшылыққа байланысты күрішсіз қалуы мүмкін деген барлық күдікті сейілтті.

"Қызылорда облысында күріш дақылдары құрғақшылықтан зардап шеккен жоқ. Өңделген түрінде 240 мың тонна өнім күтілуде. Жылдық қажеттілік - бұл мөлшердің жартысы. Яғни, күрішті экспорттауға да мүмкіндік бар. Біз күрішсіз қаламыз деген қауіп жоқ", - деп сендірді Ауыл шаруашылығы министрлігінің өкілі.