Қазақстанда жыл соңына дейін ЕАЭО елдерін қоспағанда, үшінші елдерден автомобиль көлігімен алма әкелуге уақытша тыйым салынады. Мұндай шешім вице-премьер Серік Жұманғариннің төрағалығымен Сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның (ВАК) отырысында қабылданды, деп хабарлады Үкіметтің баспасөз қызметі.
Ауыл шаруашылығы министрлігінің мәліметінше, биылғы жылы алманың жалпы жиналуы 300 мың тонна деңгейінде болжануда. Жеміс өндірісінің бұл көлеміне алдыңғы жылдары бау-бақша өсіру үшін көрсетілген мемлекеттік қолдау шараларының арқасында қол жеткізілді. 2024 жылы алма бақтарының толық жеміс беруі және өнімділіктің 18% өсуі күтілуде, бұл ішкі нарықтың қажеттілігін қамтамасыз етеді.
Бұдан басқа, ішкі нарықты мұнай өнімдерімен қамтамасыз ету жөніндегі міндеттерді назарға ала отырып, Қазақстаннан бензин, дизель отыны мен мұнай өнімдерінің жекелеген түрлерін автомобиль көлігімен әкетуге тыйым салуды ұзарту туралы шешім қабылданды.
