Ағымдағы жылдың 10 айында азық-түлік өндірісі 1,1%-ға өсіп, 2,7 трлн теңгені құрады. Бұл туралы Сенаттағы "Азық-түлік қауіпсіздігі - ұлттық қауіпсіздіктің негізгі құрамдас бөлігі" мәселесі бойынша парламенттік тыңдау барысында ауыл шаруашылығы министрі Айдарбек Сапаров мәлімдеді.
Ауыл шаруашылығы министрлігінің мәліметінше, 10 айда елімізде 80,6 мың тонна жарма өнімдері (77% - ға өсім), 604 мың тонна өсімдік майы (+10,1%), 41,1 мың тонна ірімшік пен сүзбе (+9,9%), 200,3 мың тонна ашытылған сүт өнімдері (+5,2%), 58,6 мың тонна шұжық өнімдері (+3,4%), 27 мың тонна сары май (+2,8%) өндірілді.
Қайта өңдеуді дамыту жөніндегі кешенді жоспар шеңберінде ет, сүт, күріш, жүгері, күнбағыс және қарақұмық сияқты ауыл шаруашылығы өнімдерінің негізгі түрлерін қайта өңдеу үлесін 70% - ға дейін жеткізу жоспарлануда. 2028 жылға қарай тамақ өнімдерін өндіру көлемі 4,5 трлн теңгеге дейін жеткізілетін болады.
Сонымен қатар, Айдарбек Сапаров негізгі тауарлар бойынша ішкі нарықтың қамтамасыз етілуі халықтың қажеттілігінен бірнеше есе артық екенін айтты. Атап айтқанда, ұн бойынша қамтамасыз ету қажеттіліктен 2,4 есе, күріш жармасы, күнбағыс майы – 1,7 есе, қой еті – 6%, сиыр еті – 1%-ға асады.
10 айдың қорытындысы бойынша аграрлық салада оң динамика байқалады. Ауыл шаруашылығы өндірісі 12,7%-ға өсіп, 7,1 трлн теңгені құрады. Өсімдік шаруашылығындағы өсім 18,8% немесе 4,5 трлн теңгені, мал шаруашылығында - 3,3% немесе 2,6 трлн теңгені құрады.
