Қазақстан Қытайға ІҚМ экспортына қойылатын ветеринариялық талаптарды келісті

ҚР Ауыл шаруашылығы министрлігі мен ҚХР Бас кеден басқармасы Қазақстаннан Қытайға сою үшін экспортталатын тірі ірі қара малға қойылатын ветеринариялық талаптар және жануарлардың денсаулығын қорғау жөніндегі Хаттамаға қол қойды. Құжатқа Астанада ҚХР Төрағасы Си Цзиньпиннің мемлекеттік сапары аясында қол қойылды, деп хабарлады АШМ баспасөз қызметі.

Ведомствоның мәліметінше, Қазақстаннан Қытайға сою үшін экспортталатын тірі ІҚМ-ға қойылатын ветеринариялық талаптарды келісу бойынша жұмыс екі жыл бойы жүргізілді. Сондай-ақ, ҚХР-ға құс шаруашылығы өнімдерінің, ІҚМ терілері мен қосалқы өнімдердің экспортын ашу бойынша жұмыстар жүргізілуде.

"ҚР Ауыл шаруашылығы министрлігі қазақстандық агробизнес үшін экспорттық мүмкіндіктерді кеңейту бойынша белсенді жұмыс жүргізуде. Қытайға экспортқа ерекше назар аударылуда, оның тарапынан АӨК өнімдеріне жоғары сұраныс байқалады. Атап айтқанда, 2024 жылдың ақпанында ҚХР тарапынан екі жылдан астам уақытқа созылатын аусыл мен құс тұмауы бойынша уақытша шектеулер алынып тасталды. Маусым айында ҚХР-ға алғашқы 20 тонна сиыр етін "Meat Processing and Service" ЖШС экспорттады, - деп атап өтті Ауыл шаруашылығы министрлігінде.

Бұған дейін Қазақстан мен ҚХР арасында ауыл шаруашылығы өнімдерінің тоғыз түрін: мұздатылған сиыр еті, мұздатылған қой еті, мұздатылған шошқа еті, бал, балық, сүт өнімдері, жүн шикізаты және т. б. экспорттауға хаттамаларға қол қойылған болатын.

2023 жылы тауар айналымының жалпы өсімі 1,7 есе ($1,3 млрд-қа дейін) болғанда, қазақстандық АӨК өнімінің Қытайға экспорты $1,01 млрд құрады, бұл өткен жылмен салыстырғанда (2022 жыл- $550 млн) іс жүзінде екі есе көп. Ағымдағы жылдың бес айында тауар айналымы өткен жылдың сәйкес кезеңімен салыстырғанда 14%-ға ұлғайып, шамамен $540 млн құрады.