Қазақстан АӨК сақтау қуатын 1 млн тоннаға арттырады

Логистика және сақтау жүйелерінің тапшылығына байланысты Қазақстан мен Ресейде ауыл шаруашылығы өнімдерінің шығыны 40%-ға жетеді. Бұл ретте көлік-логистика саласындағы шектеулер агроөнеркәсіптік және экспорттық әлеуетті іске асыруға әсер етеді. Бұл туралы Қазақстан президенті Қасым-Жомарт Тоқаев бүгін Қазақстан мен Ресейдің ХІХ Өңіраралық ынтымақтастық форумының отырысында сөйлеген сөзінде айтты.

Мемлекет басшысы сақтау инфрақұрылымын, оның ішінде элеваторларды, көкөніс және жеміс қоймаларын дамыту екіжақты ынтымақтастықтың маңызды бағыты болуға тиіс екенін атап өтті.

"Қазақстан жақын арада климаттық бақылау жүйесі бар өнім сақтау бойынша қуаттылықты 1 млн тоннаға арттыруды жоспарлап отыр. Бізде келешегі зор өткізу нарықтары бар – Қытай, Үндістан, Таяу Шығыс елдері. Олардың азық-түлікке сұранысы артқанын ескерсек, Солтүстік-Оңтүстік көлік дәлізінің рөлі де артады. Біздің өзара ынтымақтастығымыздың басымдықтарының бірі Орталық Азия арқылы логистиканың жаңа бағыттарын дамыту және Қытайға бар бағыттардың өткізу қабілетін арттыру болуы мүмкін", - деді Қасым-Жомарт Тоқаев.

Ол Қазақстанда Құрық пен Ақтау Каспий порттарын ауқымды жаңғырту жоспарланғанын атап өтті. Қытай бағытында Достық–Мойынты темір жол учаскесінде екінші жол салу жобасы жүзеге асырылуда. Жалпы, Қазақстанда үш жыл ішінде 1,3 мың шақырымнан астам темір жол салынады.

Қасым-Жомарт Тоқаев ынтымақтастықтың тағы бір бағыты аграрлық ғылымды дамыту және инновацияларды енгізу деп атады. Қазақстанда зерттеу университеттерінің рөлін күшейте отырып, "білім – ғылым – өндіріс" үштұғырлы жүйесі шеңберінде реформа басталды.

Ол РФ-ға коммерцияландырумен, жаңа технологияларды, соның ішінде жасанды интеллектті өнеркәсіптік енгізумен айналысатын бірлескен агроинновация орталықтарын құру бойынша жұмыс жасауды ұсынды.