Қазақстандық ауыл шаруашылығы өнімдерін Иорданияға жеткізуді кеңейту Амманда өткен сауда-экономикалық және мәдени-гуманитарлық ынтымақтастық жөніндегі Қазақстан-Иордания үкіметаралық комиссиясының бесінші отырысының тақырыбына айналды. Бұл туралы ҚР Үкіметінің баспасөз қызметі хабарлады.
Отырыста Қазақстан Иордания нарығына бидай мен ауыл шаруашылығы өнімдерінің басқа да түрлерін қоса алғанда, 15 тауар позициясы бойынша шикізаттық емес тауарларды жеткізуді ұлғайтуға дайын екендігі атап өтілді. Сонымен қатар, Қазақстан иорданиялық компаниялардың біздің еліміздің аумағында ет, астық, бұршақ және басқа да өнімдер өндіретін кәсіпорындар құруға қатысуға мүдделі.
Баспасөз қызметінің мәліметінше, иордания тарапы баламалы көлік маршруттарын, соның ішінде Каспий теңізі арқылы қазақстандық астық импортына жоғары қызығушылық танытты. Қазақстан өз тарапынан өз тауарларын Иордания нарығына және MENA елдерінің (Таяу Шығыс және Солтүстік Африка елдері) нарықтарына экспорттау үшін Акаба портының әлеуетін пайдалануға мүдделі.
Сондай-ақ, отырысқа қатысушылар екі елдің бизнес-топтарының, оның ішінде екіжақты сауда-экономикалық миссияларды ұйымдастыру арқылы тікелей өзара іс-қимыл жасау қажеттігін атап өтті. Осы мақсаттар үшін Қазақстан-Иордан Іскерлік кеңесінің жұмысы жандандырылады, оның отырысын келесі жылы Астанада өткізу ұсынылды.
2023 жылдың қорытындысы бойынша Қазақстанның Иорданиямен тауар айналымы 4,2 есеге өсіп, $6 млн құрады. Сонымен қатар, бірлескен комиссия төрағалары одан әрі өсу үшін қолда бар әлеуетті атап өтті.
