Қазақстан Арменияға ет экспорттай бастады. Алғашқы 20 тонна мұздатылған шошқа етін Солтүстік Қазақстан облысының EMC Agro компаниясы Ереванға жіберді.
EMC Agro-да атап өткендей, кәсіпорын үшін бұл шетелдік кәсіпкерлермен ынтымақтастықтың алғашқы тәжірибесі, өйткені бүгінгі күнге дейін барлық өнім тек Қазақстанда сатылды.
Сонымен қатар, жақын арада Грузияға ет жеткізу жоспарлануда.
"Біз шошқа етін Грузияға экспорттау туралы келіссөздер жүргіздік. Жақында бұл елге алғашқы 20 тонна ет жіберіледі. Мұны Қазақстан үшін үлкен оқиға деп атауға болады, өйткені бұл нарық бізге енді ғана ашылуда. Армения мен Грузия бізден ай сайын 400 тоннаға дейін ет сатып алуға дайын екендіктерін білдірді. Айтпақшы, біздің кәсіпорын ай сайын ел ішінде 700-800 тонна шошқа етін сатады. Яғни, егер біз ұзақ мерзімді перспективада осы екі бағытпен ынтымақтасатын болсақ, өнімнің 50%-ы шетелге кететін болады", - деп атап өтті компанияда.
Бұдан басқа, EMC Agro әлемдегі шошқа етінің ең ірі тұтынушысы Қытаймен ынтымақтастықты қарастыруда. Осы жылдың жазында Қытай ет қауымдастығының өкілдері EMC Agro өнеркәсіптік кешеніне барып, жылына 20 мың тонна шошқа етін импорттауға қызығушылық танытты.
"Қытайға келетін болсақ, көрші өткізу нарығы бізге маңызды, алайда бұл бағытта бізге мемлекет тарапынан қолдау қажет. Біз ҚХР Бас кеден басқармасының ауыл шаруашылығы өнімдерін жеткізушілер тізіліміне кіре алмаудамыз, осыған байланысты бұл елдің нарықтарына шығу мүмкін емес. Әкелуге тыйым Қазақстанның жеті оңтүстік-шығыс облыстары үшін ғана алынып тасталды. Бірақ біздің аймақтар Қытайға әлі мұздатылған ет жеткізе алмайды", - деп түсіндірді компанияда.
EMC agro – Қазақстандағы ет өңдеу көшбасшыларының бірі. Ет комбинатының өндірістік қуаты жылына 20 мың тонна ет және тәулігіне 30 тонна дайын өнім өндіруге мүмкіндік береді.
