Қазақстан Ресейге қызанақ экспортын қайта бастайды

Россельхознадзор 16 қаңтардан бастап Қазақстаннан қызанақ әкелуге уақытша шектеулерді алып тастады. ҚР 36 жылыжай кешенінен жеткізілімге шектеулер алынып тасталды, деп хабарлады Қазақстан Ауыл шаруашылығы министрлігінің баспасөз қызметі.

Агроөнеркәсіптік кешендегі мемлекеттік инспекция комитетінің ақпараты бойынша, 36 өндіруші карантиндік объектілерден бос деп танылған жылыжай кешендерінің тізбесіне енгізілген. Мұндай шешім Россельхознадзордың Бүкілресейлік өсімдіктер карантині орталығымен бірлесіп жүргізген материалдарын талдау, сондай-ақ АӨК-дегі қазақстандық мемлекеттік инспекция комитетінің өкілдерімен келіссөздер қорытындысы бойынша қабылданды.

Сонымен қатар, Ауыл шаруашылығы министрлігінде айтылғандай, Қазақстан өсімдік шаруашылығы өнімдерінің қалған түрлері бойынша шектеулерді алып тастау туралы келіссөздерді жалғастыруда. Естеріңізге сала кетейік, 2024 жылдың 17 қазанынан бастап Ресей Қазақстаннан бидай, жасымық, зығыр тұқымы, қызанақ, бұрыш және қауын әкелуге тыйым салды. Россельхознадзордың ақпараты бойынша тыйым салу Қазақстаннан келетін өнімдерде карантиндік объектілерді анықтау жағдайларының өсуімен байланысты.