Қазақстандық фромажерлер Александра Григолова мен Никита Кобзев Франциядағы Мondial du fromage-2023 халықаралық ірімшік және сүт өнімдері байқауында күміс және қола медаль жеңіп алды. Бұл туралы "Атамекен" ҰКП хабарлады.
Mondial du fromage 2023-халықаралық ірімшік салоны және ірімшік әлеміндегі басты оқиға. Биылғы жылы 250 төреші әлемнің түкпір-түкпірінен 1600-ден астам өнім үлгілерін бағалады.
Александра мен Никита байқауға "ЖетіЛақ" фермасының өз өндірісіндегі ешкі мен түйе сүтінен жасалған ірімшіктерді ұсынды.
"Қазақстан тарихында тұңғыш рет біздің өндірушілер үздік әлемдік ірімшік жасаушылармен конкурсқа қатысып, отандық өнімдерді ұсынды. Біздің мақсатымыз - ірімшік мәдениеті мен ірімшік жасау шеберлігін дамыту. Біз байқауға алты айдан астам уақыт дайындалдық және бұл жетістікке өте қуаныштымыз және мақтанамыз. Бізге Халықаралық ірімшік жасаушылар Гильдиясына салтанатты түрде қабылдану мәртебесі берілді. Бұл ірімшік әлемінің элитасы. Біз - Қазақстанның осы атаққа ие болған алғашқы ірімшік жасаушыларымыз", - деді Александра Григолова.
"Жеті лақ" фермасы Түпқараған ауданы Ақшұқыр ауылында 2020 жылдан бері жұмыс істейді. Ферма 10 га жерді алып жатыр және айына шамамен 3,5 тонна ешкі сүтін өңдейді. Ферманың ассортиментінде пастерленген ешкі сүті, йогурт, айран, сүзбе, қаймақ және ірімшіктің 12 түрі сияқты өнімдер бар
