Ветеринариялық бақылау және қадағалау комитеті төрағасының орынбасары болып Қазбек Тәшімов тағайындалды. Жаңа төраға орынбасарын ведомство ұжымына ауыл шаруашылығы вице-министрі Аманғали Бердалин таныстырды.
Қазбек Тәшімов биологиялық және азық-түлік қауіпсіздігі мәселелеріне жетекшілік ететін болады.
Қазіргі тағайындалғанға дейін ол Маңғыстау облысының Ауыл шаруашылығы басқармасының басшысы қызметін атқарды.
Тәшімов 1980 жылы Батыс Қазақстан облысында дүниеге келген. 2001 жылы Батыс Қазақстан мемлекеттік университетін "Ветеринариялық санитария" мамандығы бойынша бітірген. 2005 жылы сол университетте "Құқықтану" мамандығы бойынша екінші жоғары білім алды.
Қазбек Тәшімов кәсіби қызметін БҚО Тасқала ауылында АШМ Тасқала аудандық аумақтық басқармасының жетекші маманы қызметінен бастады. 2005-2011 жылдар аралығында Батыс Қазақстан облысы Тасқала ауданы әкімінің аппаратында әртүрлі лауазымдарды атқарды.
2011 жылдан бастап Ташімов Батыс Қазақстан облысы Ауыл шаруашылығы басқармасының ветеринария бөлімін басқарды, ал 2015 жылы Батыс Қазақстан облысы ветеринария басқармасының басшысы болып тағайындалды.
2017 жылдан 2021 жылға дейін Батыс Қазақстан облысының ветеринария басқармасы басшысының орынбасары қызметін атқарды.
2021-2024 жылдары Маңғыстау облысының Ауыл шаруашылығы басқармасын басқарды.
