Қытайлық инвесторлар Қазақстандағы мақта шаруашылығына инвестиция салуға дайын

Қытай делегациясы іскерлік байланыстар орнату үшін Түркістан облысына барды. Облыстық кәсіпкерлер палатасында өткен кездесу барысында делегация өкілі Джан Жин Лан мақта өңдеу зауыты мен тоқыма фабрикасының құрылысына инвестиция салуға дайын екендігін мәлімдеді. Сондай-ақ, қытайлық кәсіпорындар мақта сұрыптарын өсіруге дайын. Бұл туралы "Атамекен" ҰКП хабарлады.

Сонымен қатар, қазақстандық өндірушілермен бірлесіп, инвесторлар бидай мен жүгерінің жоғары өнімін алу бойынша жұмыс істеуге, сондай-ақ Қытайға өнім экспортын жолға қоюға ниетті. Суарудың тиімділігін арттыру және жаңа технологияларды енгізу үшін Қытай агротехнологиясы пайдаланылатын болады.

Түркістан облысы кәсіпкерлер палатасының директоры Асылан Ибадуллаевтың айтуынша, өңірде екі жылдан бері мақта мен жүгерінің өнімділігін арттыру мақсатында демонстрациялық алаңдар жұмыс істеп келеді. Халықаралық ынтымақтастық аясында фермерлер түрік мақта сұрыптарын өсіреді.

Өз кезегінде "Мақта капитал" ЖШС Бас директоры Ғалымжан Пердешов инвесторлармен жұмыс істеуге дайын екенін білдірді. Сауран кәсіпкері шетелдіктердің тамшылатып суару арқылы 500 гектарға жүгері мен бидай егу туралы ұсынысын қабылдады.

Кәсіпкерлер палатасының мәліметінше, қазіргі уақытта Түркістан облысында 22 мақта өңдеу зауыты және 200-ден астам мақта қабылдау пункттері жұмыс істейді.