Ауыл шаруашылығы министрі Айдарбек Сапаров ветеринарлық қызметтің жұмысын сынға алды. Бұл бағытта өнімді қадағалау бойынша жұмыс күшейтіледі, сондай-ақ экспорт пен импорт кезіндегі процестер цифрландырылады. Бұл туралы ҚР Ауыл шаруашылығы министрлігінің баспасөз қызметі хабарлады.
Ветеринариялық қауіпсіздік мәселелері жөніндегі көшпелі кеңесте Айдарбек Сапаров саланың проблемаларына: жануарлардың бақылаусыз қозғалуына, жануарларды диагностикалық зерттеулермен уақтылы қамтымауына, иелерінің ауру жануарларды санитариялық союға тапсыру туралы нұсқамаларды сақтамауына назар аударды.
"Ауру жағдайларын болдырмау үшін барлық шаруашылықтарды толық бақылау қажет", - деді АШМ басшысы.
Сондай-ақ, АӨК дамытудың 2021-2030 жылдарға арналған тұжырымдамасына сәйкес өңірлерді ветеринариялық пункттермен, мал қорымдарымен/инсинераторлармен және сою объектілерімен қамтамасыз ету жөніндегі жұмысты жеделдету қажеттігі атап өтілді.
Министрлік өз тарапынан мал шаруашылығы өнімдерін қадағалау бойынша пилоттық жобаны іске асыруда. Ағымдағы жылы барлық өңірлерде "Етті ветеринариялық-санитариялық сараптау" модулін енгізу аяқталады, бұл сараптама актілерін беру процесін автоматтандыруға және жануардың өмірлік циклінің қадағалануын қамтамасыз етуге мүмкіндік береді.
Сондай-ақ, жаңа цифрлық жүйе - карантиндеу және ҚР шегінен тыс жануарларды әкету кезінде карантиннен өтудің толық циклін қадағалау үшін квоталау әзірленуде. Жүйені іске қосу ағымдағы айда жоспарланып отыр.
Содан кейін ауыл шаруашылығы мақсатындағы тауарлардың ҚР шекарасы арқылы (экспорт-импорт) өту процестерін цифрландыру басталады, бұл барлық мал шаруашылығы өнімдерінің өтпелі қадағалануын, жануарлар мен жануарлардан алынатын жүктердің электрондық сертификатталуын қамтамасыз етіп қана қоймай, олардың қозғалу жолдарын да қадағалайды.
Сондай-ақ, баспасөз қызметі кеңес барысында бірқатар облыстардың аумақтық инспекцияларының басшыларына нашар бақылау үшін сөгіс жарияланғанын хабарлады.
