Сыбайлас жемқорлыққа қарсы іс-қимыл агенттігі жер комитетінің қызметіндегі сыбайлас жемқорлық тәуекелдеріне талдау жүргізеді

ҚР Ауыл шаруашылығы министрлігі мен Қазақстан Республикасының Сыбайлас жемқорлыққа қарсы іс-қимыл агенттігі (Сыбайлас жемқорлыққа қарсы қызмет) АШМ Жер ресурстарын басқару комитетінің қызметінде сыбайлас жемқорлық тәуекелдеріне сыртқы талдау жүргізу туралы бірлескен бұйрыққа қол қойды. Бұл туралы Жер ресурстарын басқару комитетінің төрағасы Мұрат Теміржанов мәлімдеді.

"Жерді пайдалану және қорғау саласындағы қалыптасқан жағдайды талдау жердің түрлі құқық бұзушылықтар, оның ішінде сыбайлас жемқорлық қылмыстар жасау объектісі болып табылатынын көрсетеді. Жалпыға белгілі факт конкурстар мен аукциондардан тыс коммерциялық мақсаттар үшін жер учаскелерін беру, құрылыс және өзге де мақсаттар үшін қосымша жер учаскелерін беру, нысаналы мақсатын заңсыз өзгерту, жер учаскелерін сегменттеу және кейіннен сату, елді мекеннің бас жоспарлары болмай, қала құрылысы регламенттерін бұза отырып жер беру болып табылады", - деп атап өтті Теміржанов.

Ол президент кәсіпкерлерге жер учаскелерін жедел және ашық бөлу үшін пәрменді тәсілдерді әзірлеуді, сондай-ақ иесіз немесе мақсатына сай пайдаланылмайтын жерлер туралы ақпаратқа қол жеткізуді қамтамасыз етуді тапсырғанын еске салды.

"Алдағы уақытта біз жүргізіп жатқан бірлескен жұмыс сыбайлас жемқорлық тәуекелдерін төмендетуге ықпал ететініне, сондай-ақ жер қатынастары саласындағы жүйелі проблемаларды шешетініне сенімдімін", - деп қорытындылады Жер ресурстарын басқару комитетінің төрағасы. Естеріңізге сала кетейік, 2021 жылы Сыбайлас жемқорлыққа қарсы іс-қимыл агенттігі ҚР Ауыл шаруашылығы министрлігінің қызметіндегі сыбайлас жемқорлық тәуекелдеріне сыртқы талдау жүргізді. Бұл жұмыстың нәтижесі қазіргі уақытта талқыланып жатқан және жақын арада қабылдануы тиіс ауыл шаруашылығын субсидиялау ережелеріне түзетулер болды.