Қостанайлық фермерлерге қосымша мемлекеттік қолдау көрсетіледі

Қостанай облысында егін жинау науқаны басталғаннан бері жауын-шашын тоқтамауда, бұл егінге теріс әсер етеді. Өңірдің аграрларымен ауыл шаруашылығы министрлігінің, Азық-түлік корпорациясының және "Бәйтерек" холдингінің өкілдері кездесті, олар қазіргі жағдайда қосымша қолдау туралы айтты.

Ауыл шаруашылығы министрлігінің баспасөз қызметі хабарлағандай, ауа райының қолайсыздығына байланысты Қазақстанның солтүстік өңірлерінде егін жинау үшін АШМ жанынан арнайы комиссия құрылды.

Қостанай облысының аграрларымен кездесуде АШМ ауыл шаруашылығы департаментінің директоры Азат Сұлтанов дәнді дақылдарды кептіруге жеңілдікті ЖЖМ бөлу жағдайы туралы хабардар етті. АШМ-де ауыл шаруашылығы дақылдарын кептіруді жүргізу үшін астық қабылдау кәсіпорындарының ЖЖМ алу мүмкіндігін регламенттейтін нормативтік құқықтық акт әзірленді және келісу сатысынан өтуде. Өткізілмеген отынның қолда бар резерві өңірдің қажеттіліктерін қамтамасыз ету үшін жеткілікті болады.

"Өңірдің астық жинауға қосқан үлесінің маңыздылығын ескере отырып, келесі жылы егіс жұмыстарын жүргізу үшін тұқым қорын қалыптастыру жеке зерделенетін болады. "Бәйтерек" холдингінің қаржы ұйымдары тарапынан ауа-райына байланысты зардап шеккен фермерлердің несиелері мен лизингін ұзарту мәселесі жеке тәртіппен қаралатын болады", - деп атап өтті Ауыл шаруашылығы министрлігі.

Қостанай облысы әкімдігінің деректері бойынша өңірдегі астық жинау алаңы 4,37 млн га құрайды, оның 1,01 млн га немесе 23,2% жиналды. Орташа өнімділік 9,1 ц/га кезінде 920,7 мың тонна астық бастырылды.