Қазақстан Үкіметі дала жұмыстарын қаржыландырудың қосымша көздерін тарту бойынша жұмыс жүргізуде. 2024 жылы жеңілдетілген несиелеу сомасын 425 млрд теңгеге ұлғайту жоспарлануда. Бұл туралы үкімет отырысында ауыл шаруашылығы министрі Айдарбек Сапаров мәлімдеді.
"Сапалы тұқым, тыңайтқыштар, пестицидтер, ЖЖМ және т.б. қолдануды қамтитын барлық қажетті агротехникалық іс-шараларды ескере отырып, көктемгі егіс және егін жинау жұмыстарын сапалы жүргізу үшін жеңілдетілген несиелеуге шамамен 1,5 трлн теңге қажет. Сонымен қатар, ағымдағы жылы "Кен-дала" бағдарламасы аясында 140 млрд теңгеге қаржыландыру қарастырылған. Қазіргі уақытта жалпы сомасы 134 млрд теңгеге 1 434 өтінім келіп түсті, оның ішінде жалпы сомасы 37,8 млрд теңгеге 811 өтінім мақұлданды", - деді Ауыл шаруашылығы министрлігінің басшысы.
Сонымен қатар, форвардтық сатып алу бағдарламасына 40 млрд теңге бағытталды. Бүгінгі таңда аграрлар жалпы сомасы 24 млрд теңгеге 196 өтінім берді.
"Қалған қаражатты бөлу мәселесі басқа қаржыландыру көздерінен (оның ішінде жергілікті бюджеттен 100 млрд теңге) пысықталуда, бұл көктемгі егіс жұмыстарына қосымша 425 млрд теңге көлемінде жеңілдікті несиелер тартуға мүмкіндік береді",-деді Айдарбек Сапаров.
Ол сондай-ақ Энергетика министрлігінде дизель отынын жөнелту кестесін бекіткенін хабарлады. Жеңілдетілген дизельдің құны 250 теңге/литрді құрайды.
