"Ауыл аманаты" бағдарламасы іске асырыла бастағаннан бері ауылдарда бизнесті дамытуға 25 млрд теңге көлемінде несиелер берілді. Ағымдағы жылға осы бағдарламаны қаржыландыруға барлығы 100 млрд теңге бөлінді. Бұл туралы Орталық коммуникациялар қызметінде өткен брифингте Ауыл шаруашылығы министрлігі қаржы құралдары және шағын несие беру департаментінің директоры Тұрар Мұхамеджанов мәлімдеді.
"Жалпы республика бойынша бүгінгі таңда 4600-ден астам өтінім мақұлданып, 25 млрд теңге сомаға несие берілді", - деді АШМ өкілі.
Атап айтқанда, Ақмола облысы үшін 1,2 млрд теңге бөлінді. Бүгінгі таңда онда 620 млн теңге сомасына несиелер берілді.
Биыл бұл бағдарлама алғаш рет республикалық ауқымда іске асырылуда. Енді несие алу үшін берілген құжаттардың дұрыс ұсынылмауына байланысты қиындықтар анықталуда.
"Несиелер негізінен ауылдық елді мекендерде беріледі. Сондықтан олардың кепіл мүлкі - үйлер, ауылдағы жерлер. Көп жағдайда ауылдардағы үйлерге құжаттар дұрыс емес. Осы себепті несиелерді мақұлдау мерзімі де ұзартылады. Осындай несиелердің аз берілуінің себептерінің бірі осы", – деп түсіндірді Тұрар Мұхамеджанов.
Ол ағымдағы жылы бөлінген 100 млрд теңге 17 мыңға жуық шағын несие беруге есептелгенін атап өтті. Ал 2029 жылға дейін бұл бағдарламаға 1 трлн теңгеге дейін қаражат бөлу жоспарлануда.
"Келесі жылы тағы 100 млрд теңге бөлуді жоспарлап отырмыз. Қазіргі уақытта республикалық бюджеттің жобасы әзірленді", - деді шағын несиелеу департаментінің директоры.
Ол сондай-ақ "Ауыл аманаты" бағдарламасы бойынша несие алғысы келетін азаматтарға қандай талаптар қойылғанын нақтылады.
"Ең басты талап - ауылдық елді мекеннің тұрғыны болу. Ұсынылған бизнес-жоба сол ауылдық жерде жүзеге асырылуы керек. Бұл бағдарламаға жұмыссыздар, сондай-ақ өзін-өзі жұмыспен қамтыған немесе жеке қосалқы шаруашылықпен айналысатын және өз ісін бастаған кәсіпкерлер қатыса алады", - деп түйіндеді Мұхамеджанов.
