КРО БҚО фермерлерінен өнім сатып алатын болады

Karachaganak Petroleum Operating ірі мұнай-газ өндіруші консорциумы Батыс Қазақстан облысының әкімдігімен жергілікті ауыл шаруашылығы өндірушілерінің өнімдерін сатып алу туралы Меморандумға қол қойды. Бұл туралы ли ҚР премьер-министрінің баспасөз қызметінен хабарлады.

Қол қою ҚР премьер-министрінің орынбасары Тамара Дүйсенованың өңірге жұмыс сапары аясында өтті.

"Біздің елімізде көптеген ірі кәсіпорындар жұмыс істейді және олардың барлығында сапалы өнімдерге сұраныс бар. Бұл тәжірибе басқа компаниялар үшін де үлгі болатынына сенімдімін", – деді Тамара Дүйсенова.

Өз кезегінде тараптар қол жеткізілген келісімнің өзара тиімділігіне тоқталды.

"Мемлекет басшысы ауылдық жерлерде бизнесті қолдау мен дамыту мәселелеріне ерекше назар аударуды тапсырды. Бүгінгі меморандум "Ауыл аманаты" жобасына қатысушылар үшін үлкен көмек болып табылады. Ауыл шаруашылығы өнімдерін өндірушілерде ірі және, ең бастысы, тұрақты тұтынушы пайда болды", - деді Батыс Қазақстан облысының әкімі Нариман Төреғалиев.

Келіссөздер барысында логистика мәселелері талқыланды. БҚО елді мекендері арасындағы қашықтық тауарлардың түпкілікті құнына әсер ететіні атап өтілді. Мәселені шешу үшін орталық оператор ретінде "Ақ Жайық" ӘКК-ні қосу туралы шешім қабылданды. Отандық өндірушілерге өнімді тасымалдау кезінде қолдау көрсетілетін болады.

Консорциум басшылығы осы бағыттағы тығыз ынтымақтастыққа дайын екендіктерін білдірді.

"Экологиялық таза және сапалы азық-түлік өнімдерін сатып алу бойынша қол жеткізілген уағдаластықтар кәсіпорын қызметіне оң әсерін тигізетініне сенімдімін. Біздің кеңселеріміз бен зауыттарымыз Батыс Қазақстан облысында орналасқандықтан, бізге жергілікті өнімдерді сатып алу ыңғайлы", - деді Karachaganak Petroleum Operating компаниясы бас директорының орынбасары Мұхтар Манкеев.