Түркістан облысының Келес ауданында, Бірлік кентінде еліміздегі ең ірі жылыжай кешенінің капсуласын салу рәсімі өтті. Өнеркәсіптік жылыжайлар кешені 500 га алады. Жоба "ЭКО-культура" компаниясының қолдауымен жүзеге асырылуда. Бұл туралы облыс әкімінің баспасөз қызметі хабарлады.
Бірінші кезекте ауданы 51 гектардан асатын жылыжай салынады. Жобаға инвестициялардың жалпы көлемі 524 млрд теңгені құрайды, бұл ретте бірінші кезеңде 51,6 млрд теңге бағытталады. Қуаты жылына 225 мың тонна қызанақты құрайды. Кешен толық қуатына шыққаннан кейін мұнда 8 мыңнан астам адам жұмысқа орналасады.
"Түркістан Республика халқын жеміс-көкөніс өнімдерімен, оның ішінде жылыжай кешеніндегі қызанақ пен қиярмен қамтамасыз ететін негізгі өңір екені белгілі. Облыста 1 569 га алаңда 3 366 жылыжай немесе Республиканың 71% жылыжайы орналасқан. Мұнда 12 мыңнан астам адам жұмыс істейді. 87 га өнеркәсіптік жылыжайларды алып жатыр. 2015 жылмен салыстырғанда бұл салаға инвестиция көлемі жеті есеге ұлғайды, өткен жылы ол 74,7 млрд теңгені құрады", - деді салтанатты шарада Түркістан облысының әкімі Дархан Сатыбалды.
Ол аймақтық билік жаңа жобаны толығымен қолдауға дайын екенін атап өтті. Жылыжайларды іске қосу өңірдің нарығына отандық өнімді жеткізуді ұлғайтуға және жаңа жұмыс орындарын құруға ықпал ететін болады.
Жобаның бірінші кезеңінің құрылысын 2024 жылдың тамызында аяқтау жоспарлануда. Ал жылыжай кешені 2027 жылға қарай пайдалануға беріледі. Бірінші кезеңдегі жұмыс орындарының саны 1000 болады.
Жылыжай мегакешенінің жобасы қазақстандық Green Land Alatau компаниясының қатысуымен жүзеге асырылуда.
Қазіргі заманғы жылыжай кешендерін заманауи автоматтандырылған климаттық бақылау жүйесімен, жылыту және салқындатуды басқару жүйесімен, жарық режимімен, тамшылатып суарумен, атмосферадағы көмірқышқыл газының мөлшерімен жабдықтау жоспарлануда, деп хабарлады баспасөз қызметі.
