"Қазақстан темір жолы" компаниясы 1,3 млн тонна көлемінде астық тасымалдаудың негізгі жоспарын және 393 мың тонна көлемінде ұнтақтау өнімдерін келісті. Бұл туралы компанияның баспасөз қызметі хабарлады.
"Қазанға астық тасымалдаудың негізгі жоспары 1,3 млн тонна көлемінде келісілді. Бұл көрсеткіш қыркүйек айындағы астық тасымалдау көлемінен 490 мың тоннаға артық. Ел ішінде 158 мың тонна көлемінде, экспортқа – 1,2 млн тоннадан астам тасымалдау келісілді. Қазанға арналған ұнтақтау өнімдерін (ұнды) тасымалдаудың негізгі жоспары 393 мың тонна көлемінде, республика бойынша - 55 мың тоннадан астам, экспортқа - 337 мың тоннадан астам көлемде келісілді", - деп хабарлады ұлттық компания.
ҚТЖ астық пен ұнтақтау өнімдерінің үлкен үлесі экспортқа бағытталатынын атап өтті. Бұл ретте Сарыағаш станциясының теміржол өтпелі пункті арқылы 663 мың тонна астық пен 245 мың тонна ұнтақтау өнімдерін экспорттау жоспарлануда. Ол үшін Өзбек темір жолымен тасымалдарға сұраныстың артуы кезеңінде пойыздарды қабылдауды ұлғайту туралы уағдаластыққа қол жеткізілді.
Қыркүйек айында теміржол арқылы астық тасымалдау өткен жылдың сәйкес деңгейімен салыстырғанда 8% - ға артып, 806 мың тоннаны құрады. Экспорт 21% - ға өсті. Ұнтақтау өнімдерін тиеу 2% - ға өсіп, 264 мың тоннаны құрады. Республика бойынша жүк тиеу 15%-ға артты.
