Қырғызстан ағымдағы маусымда Қазақстан үшін су беруді ұлғайтады

2024 жылғы вегетациялық маусымда Қырғызстаннан Қазақстанға Шу өзені бойынша 180 млн текше метр және Талас өзені бойынша 380 млн текше метр су келеді. Мұндай келісімге Шу-Талас су шаруашылығы комиссиясының 33-ші отырысы барысында қол жеткізілді, деп хабарлады ҚР Су ресурстары және ирригация министрлігінің баспасөз қызметі.

Тараптар сондай-ақ Шу және Талас өзендерінде орналасқан су шаруашылығы құрылыстарындағы жөндеу-қалпына келтіру жұмыстарының түрлері мен көлемі туралы уағдаласты.

Бұған дейін Қазақстан мен Өзбекстанның су ведомстволары ҚР-ға "Достық" мемлекетаралық каналы арқылы 922 млн текше метр су беру туралы уағдаласқан болатын.

"Халықаралық ынтымақтастық – министрлігіміздің жұмысының негізгі бағыттарының бірі. Суару маусымына дайындық барысында елдің оңтүстігіндегі фермерлерді судың қажетті көлемімен қамтамасыз ету бойынша үлкен жұмыс жүргізілді, көрші мемлекеттермен маңызды келіссөздер жүргізілді. Бүгінгі таңда Қырғызстанның су ресурстары министрлігінің басшылығымен маусымның үшінші онкүндігінің басынан бастап Шу және Талас өзендері бойынша су беруді ұлғайту туралы уағдаластыққа қол жеткізілді. Қазіргі уақытта қырғыз әріптестермен бірлесіп су беру кестесін ұлғайту бағытында түзету жұмыстары жүргізілуде", - деді ҚР Су ресурстары және ирригация министрі Нұржан Нұржігітов.