Қарағанды облысының Нұра ауданындағы Ахмет ауылы 30 күнге карантинге жабылды. Оқшауланудың себебі үй құсының жаппай қырылуы болды. Бұл туралы Kazinform хабарлады.
Үй құстарының өлімі Ахмет кентіндегі бірнеше аулада тіркелді. Ветеринарлық сараптаманың қорытындысы өлген тауықтарда New castle деп аталатын инфекцияны көрсетті. Жергілікті тұрғындар аурудың өршуі қыркүйек айында басталғанын айтады. Нәтижесінде, бүгінгі күнге дейін бір көшеде орналасқан жеті ауладан 223 бас құс өлді.
Бұл инфекция Қарағанды облысында алғаш рет тіркелді. Осы уақытқа дейін бұл ауру осы және жақын маңдағы елді мекендерде тіркелмегендіктен, құстар инфекцияға қарсы вакцинацияланбаған.
"Бұл ауру адамдарға жұқпайды, сондықтан халық үшін ешқандай қауіп жоқ. Алдын ала екпе жасамауымыздың себебі – ол вакцинация жоспарында болмауы. Өйткені бізде бұрын-соңды Ньюкасл ауруы тіркелген емес. 10 қазаннан бастап біз ауылды карантинге жаптық. Енді қалған сау құстарға вакцина егетін эпидемияға қарсы отрядтың келуін күтудеміз. Олар сондай-ақ тауық қораларында дезинфекция жүргізеді. Келесі жылдан бастап біз осы ауруға қарсы вакцинаны жоспарға енгіземіз", - деді Ахмет ауылының ветеринар дәрігері Нұрила Бахрам.
Маманның айтуынша, тек тауықтар Ньюкасл ауруынан зардап шегеді. Күркетауықтар, қаздар немесе басқа үй құстары бұл инфекцияны жұқтырмайды.
