Түркістан облысында халықаралық логистикалық орталық ашылды

Түркістан облысының Арыс қаласында "Мега-Агат" көлік-логистикалық орталығы пайдалануға берілді. Нысан ТМД елдерімен, сондай-ақ Азия мен Еуропамен сауда байланыстарын нығайтуға бағытталған. Бұл туралы облыс әкімінің баспасөз қызметінен хабарлады.

Орталықтың іске қосылуы азық-түлік бағасын тұрақтандыруға және көлік шығындарын төмендетуге ықпал етеді.

Кешеннің ауданы 6 гектарды құрайды. Қойма үй-жайлары 17 мың шаршы метрді алып жатыр, оның ішінде: 14 мың шаршы метр қатты жүктерді сақтауға арналған. 3 мың шаршы метр көкөністер мен тез бұзылатын өнімдерге арналған желдету жүйелерімен жабдықталған. Кірме теміржол жолдары мен жүк тасымалдауды ұйымдастыру пункті бар. Кеден қызметтері тиімді және жедел ұйымдастырылған.

"Мега-Агат" компаниясының директоры Әлішер Рүстембектің айтуынша, жобаның құны 4 млрд теңгені құрады. Кешен еуропалық стандарттарға сәйкес салынған және логистиканың жоғары талаптарына жауап беретін заманауи технологиялармен жабдықталған. Арыстың көлік торабы ретіндегі стратегиялық орналасуы орталықты өңірлік және халықаралық тауар айналымы үшін маңызды хабқа айналдырады.

Бұдан басқа, "Мега-Агат" ЖШС базасында күнбағыс, мақта және мақсары майларын өндіретін зауыт құрылысына капсула салынды. Автоматтандырылған экстракциялық кешеннің құны 9 млрд теңгені құрайды. Зауыт тәулігіне 500 тоннадан астам май өндіретін болады. Жоба 150 жергілікті тұрғынды жұмыспен қамтамасыз етеді.