Ауыл шаруашылығы министрлігі мал әкетуге квоталарды жаңартты

Қазақстан ауыл шаруашылығы министрлігінің басшысы бұқашықтар мен қошқарларды әкетуге квота белгілейтін "Қазақстан Республикасының аумағынан ауыл шаруашылығы жануарларын әкетудің кейбір мәселелері туралы" бұйрыққа қол қойды. Бұйрық күнтізбелік он күн өткен соң қолданысқа енгізіледі.

12 айдан асқан бұқашықтардың экспортына квоталар 85 мың бас, 6 айдан асқан қошқарларды әкетуге – 120 мың бас мөлшерінде белгіленді.

Бордақылау алаңдары үшін бұқашықтар бойынша лимит 55 мың басты (бір алаңға 4 мың бастан аспайды), ал тауар өндірушілер үшін – 30 мың басты (бір өндірушіге 500-ден аспайды) құрайды.

Бордақылау алаңдары мен тауар өндірушілерге арналған қошқарларды әкетуге арналған квоталар тең бөлінеді - 60 мың бас, бұл ретте лимит бір бордақылау алаңына – 1000 бас, ал бір өндірушіге - 500 бас.

Бұйрықта сондай-ақ бір бордақылау алаңына берілетін квота оның қуатының 20%-дан аспайтыны және квотаны бөлу кезінде бордақылау алаңындағы мал басының нақты саны сұралған квота көлемінен екі есе көп болуы тиіс екендігі айтылады.