Қазақстан Президенті екінші деңгейдегі банктерді агроөнеркәсіптік кешенді қаржыландыруға тарту жөнінде ұсыныстар енгізуді жеделдетуді тапсырды. Ауыл шаруашылығы министрлігінде саланы жеңілдетілген несиелеу бойынша осы және басқа да міндеттерді іске асыру мәселелері талқыланды, деп хабарлады ведомствоның баспасөз қызметі.
Ауыл шаруашылығы министрі Айдарбек Сапаровтың айтуынша, банктерді ауыл шаруашылығын несиелендіруге белсенді тарту жұмыстары басталып кетті.
"Екінші деңгейдегі банктерді АӨК-ні несиелеуге сыйақы мөлшерлемелерін субсидиялау құралын қайта қарау есебінен тарту жоспарлануда. Ағымдағы жылы көктемгі егіс және егін жинау жұмыстарын несиелеу кезінде біз фермерлер бірден арзандатылған қарыз алған кезде сыйақы мөлшерлемесін арзандату тетігін қолдандық. Келесі жылы ұқсастық бойынша айналым қаражатын сатып алуға қайта өңдеу кәсіпорындарын жеңілдікпен қаржыландыру іске қосылады", - деді Айдарбек Сапаров.
Ағымдағы жылы көктемгі егіс және егін жинау жұмыстарын қаржыландыруға 580 млрд теңге бағытталды, оның 100 млрд теңгесі ауыл шаруашылығы техникасының жеңілдетілген лизингіне көзделген.
Сонымен қатар, Павлодар, Батыс Қазақстан, Шығыс Қазақстан және Қызылорда облыстарында осы бағыттағы әлсіз жұмыс атап өтілді - онда 22 млрд теңге игерілмеген.
"Бірқатар өңірлердің ӘКК ауыл шаруашылығы өндірушілерімен жұмыс істемейді. Сонымен қатар, аграрлар қазіргі уақытта бұл қаражатқа мұқтаж және оларды егін жинауда пайдалана алар еді", - деп атап өтті министр.
Ол сондай-ақ ауыл шаруашылығы өнімдерін қайта өңдеу кәсіпорындарын айналым қаражатымен қамтамасыз ету мәселесіне назар аударды. Олар үшін айналым қаражатын несиелеуге үкімет резервінен 4,8 млрд субсидия көзделетін болады, бұл жеңілдетілген несиелеу түрінде 31,8 млрд теңге беруге мүмкіндік береді.
Осыған байланысты Аграрлық несие корпорациясына қысқа мерзімде ауыл шаруашылығы өнімдерін қайта өңдеу кәсіпорындарының сыйақы мөлшерлемесі жылдық 5%-дан аспайтын шикізат сатып алуы үшін жеңілдетілген несие беру бағытында шаралар қабылдау тапсырылды.
Қаражаттың нашар игерілуі ауыл шаруашылығы техникасының лизингі бағдарламасы бойынша да байқалады. Қаржы лизингі шарттары қарастырылған 100 млрд теңгенің 73,1 млрд теңге сомасына 2 856 бірлік ауыл шаруашылығы техникасын жеткізуге жасалған. Бұл ретте фермерлерден ауыл шаруашылығы техникасына өтінімдер 120 млрд теңгеге түсті.
ҚазАгроҚаржыға қаржыландыру көлемін қайта қарау тапсырылды.
"АНК мен ҚАҚ-ға ауыл шаруашылығы өндірушілері арасында несиелеу мүмкіндіктері туралы ақпараттық жұмысты күшейту қажет. Көптеген фермерлер қолданыстағы бағдарламалар туралы білмейді. Әрине, бұл жерде кінә өз фермерлеріне арзан несиелер мен лизинг алуға болатынын жеткізбейтін өңірлердің ӘКК-де жатыр. Фермерлерді қазір қажетті техникамен қамтамасыз ету керек, процедуралық мәселелерді жеңілдету үшін жұмыс істеу керек", - деді Айдарбек Сапаров.
Сонымен қатар, ол ҚазАгроҚаржыға кептіргіштердің жеңілдікті лизингі мәселесін шұғыл түрде пысықтауды тапсырды.
