Ауыл шаруашылығы министрлігі агроөнеркәсіптік кешен саласындағы жобаларға несие беру қағидаларын бекітті. Солтүстік Қазақстан облысының тәжірибесін тарату шеңберінде 2023 жылы республикалық бюджеттен 100 млрд теңге бөлінді. Бұл туралы АШМ баспасөз қызметі хабарлады.
Ағымдағы жылы 100 млрд теңге 65 сүт-тауар фермасының құрылысын қаржыландыруға бағытталатын болады. Несиелер беру сенім білдірілген өкіл (агент) арқылы 2,5%-бен, 10 жылға дейінгі мерзімге, қарыздың ең жоғары сомасы 5 млрд теңгеге дейін жүргізілетін болады.
Несиелер жаңа кәсіпорындар құру немесе жұмыс істеп тұрған кәсіпорындарды, оның ішінде сүт-тауар фермаларын (қуаты 400 бастан бастап), ет бағытындағы құс фабрикаларын (жылына 5000 тонна құс етінен бастап), көкөніс қоймаларын (1000 тоннадан бастап), сондай-ақ заманауи су үнемдеу технологияларын қолданумен (шашырату, тамшылатып суару) суармалы егіншілік саласындағы жобаларды (картоп, көкөністер, жемшөп өндірісі) құру үшін берілетін болады.
